Melodie ngo ari ku rugamba rwo gukura muzika ye mu Rwanda

Itahiwacu Bruce ukora muzika ku izina rya Bruce Melodie, ngo urugamba afite muri we ni ugukura muzika ye mu Rwanda igafata Akarere k’Afurika y’Iburasirazuba, Afurika yose muri rusange ndetse no ku isi.

Ni nyuma y’aho kugeza ubu yamaze kurangiza kubaka studio ataravuga izina ryayo izajya imukorera indirimbo aho kuba yajyanaga amafaranga mu ma studios atandukanye ashaka ko bamukorera indirimbo.

Avuga ko ayo mafaranga yajyaga atanga hari ikintu kinini agiye kumufasha mu buryo bwo kumenyekanisha ibihangano bye ‘Promotion’ hanze y’igihugu.

Mu kiganiro na Isango Star, Bruce Melodie yatangaje ko imwe mu ndwara iri mu bahanzi nyarwanda ari ukwigaya bakumva ntaho bahera bamenera ngo bafatishe mu bindi bihugu.

Yagize ati “Umutwaro wa mbere mfite ni ugushaka uburyo muzika yanjye imenyekana ahantu hose. Kuko abahanzi tubona bakomeye nabo batangiye bitaboroheye.

Icya mbere ni ukudacika intege ngo twumve ko ntaho twahera ngo dufatishe Afurika cyangwa n’isi muri rusange.

Ubu umwe mu mishinga mfite inkomereye ni uko indirimbo nshaka gushyira hanze mu minsi izaza izanyura kuri televisions zikomeye cyane yaba izo muri Afurika cyangwa se n’izo mu mahanga”.

Mu cyumweru gishize nibwo uyu muhanzi urubanza rwe na Richard yaregwagamo miliyoni 18 yagombaga kwishyura rwarangijwe. Urukiko rukaba rwarafashe umwanzuro ko agomba kwishyura miliyoni eshatu muri 18 yasabwaga.

Joel Rutaganda

UM– USEKE.RW