Mc Tino ntiyemeranya na Mico ku kwibwa muri PGGSS6

Kasirye Martin umunyamakuru, Mc, umuhanzi akaba n’umukinnyi wa filime zisetsa ‘Comedy’ uzwi cyane nka Mc Tino mu itsinda rya TBB, ngo ntiyiyumvisha uburyo Mico The Best yavuga ko yibwe amajwi bigatuma atitabira irushanwa rya Primus Guma Guma Super Star6.

Ni mu matora yabaye ku itariki ya 24 Werurwe 2016 akorwa n’abanyamakuru, Aba Djs, Producers n’undi muntu wese ufite aho ahurira n’umuziki w’u Rwanda.

Uko itegeko ryavugaga ku muhanzi wagombaga kwinjira mu irushanwa, ni uko hagombaga kuboneka umubare w’abahungu umunani (8) n’abakobwa babiri.

Mu myanya 10 ya mbere y’abahanzi bagomba kwitabira irushanwa rya Primus Guma Guma Super Star6 muri ayo matora, harimo Allioni wenyine kandi bagomba kuba babiri.

Icyo gihe hafashwe icyemezo cy’uko Teta Diana wari ku mwanya wa 13 yinjizwa mu bahanzi 10 ariko ajya ku mwanya wa cyenda hasigara umwanya umwe wagombaga guhatanirwa na TBB ndetse na Mico.

Uko amatora yari yakozwe hakoreshejwe uburyo bw’impapuro, byarahindutse ahubwo noneho biba ngombwa ko hakoresha umubare w’abantu benshi bari bumanike ukuboko.

Itsinda rya TBB nibwo ryaje kwegukana uwo mwanya ku mubare munini w’ubwiganze bw’abajwi y’abanyamakuru, Producers, n’aba Djs batsinda Mico.

Nyuma yo gushyirwa hanze urutonde rw’abahanzi 10 bazitabira Primus Guma Guma Super Star6 Mico The Best ntiyangeho, yasabye Bralirwa ko yarenganurwa uburyo bwakoreshejwe bwo guhitamo umuhanzi wa 10 bugasubirwamo.

Ibi rero byatumye Mc Tino wo mu itsinda rya TBB abwira Umuseke ko atiyumvisha neza ibyo Mico avuga kuko atari ari mu bagombaga gutora kandi ibyo bakoze aribyo babonaga bikwiye.

Yagize ati “Mico nareke kwirirwa asaba ko yarenganurwa. Ese ninde ubundi wamurenganyije?Bralirwa se iratora ko hatora abanyamakuru? Uburyo bwo gutora ku mpapuro se bwajyaga gutorwa na bande? Sibo se batoye bamanika intoki?”.

Tino akomeza avuga ko ari ubushake bw’Imana kuba nka TBB yarakomeje kuko si ubushake bw’abantu nubwo aribo bakorereshajwe n’Imana bagatora TBB kurusha Mico.

Joel Rutaganda

UM– USEKE.RW