Mbere yo kujya muri Zambia APR FC yanganyije na Virunga FC y’i Goma

*APR FC izahagararira u Rwanda mu mikino nyafurika ya ‘CAF Champions League 2017’.

Mu kwitegura umukino w’ijonjora ry’ibanze izahura na Zanaco FC mu mpera z’iki cyumweru i Lusaka muri Zambia, APR FC yanganyije 1-1 na Virunga FC yo muri DR Congo mu mukino wa gicuti.

Mu Karere ka Rubavu niho hakomeje umwiherero n’imyitozo yaAPR FC. Umukino wa gicuti iyi kipe y’ingabo yakinnye kuri iki cyumweru yaguye miswi n’ikipe ya Virunga FC itozwa n’umunyarwanda Bizimana Abdul “Bekeni”.

Iyi kipe yo muri DR Congo irimo n’abakinnyi baciye muri Shampiyona y’u Rwanda nka Kasongo Kabiona witwaga Kalisa Mao agikinira amakipe akomeye mu Rwanda nka Rayon Sports, APR FC n’ikipe y’igihugu Amavubi.

Wari umwanya ku bakinnyi ba APR FC batabona umwanya uhoraho n’abavuye mu mvune ngo bigaragaze kuko Maxime Sekamana na Onesme Twizerimana babanjemo.

Abakunzi ba ruhago b’i Rubavu bategereje iminota 61 ngo babone igitego cya mbere muri uyu mukino gitsinzwe na Fiston Mundele.

APR FC yaje kwishyura icyo gitego cyitsinzwe na Kasongo Mao Kabiona wanayikiniye. Umukino urangira amakipe yombi anganyije 1-1. Uyu wari umukino wa nyuma wa gicuti APR FC ikinnye.

APR FC Irakomeza umwiherero i Shyorongi mu Karere ka Rulindo mbere yo kujya i Lusaka muri Zambia kuwa kane tariki 9 Gashyantare 2017, ikitegura umukino wa Zanaco FC uzaba ku cyumweru.

Abakinnyi Jimmy Mulisa yabanje mu kibuga

Kimenyi Yves, Ngabo Albert, Ngando Omar, Usengimana Faustin, Rutanga Eric, Djamar Mwiseneza, Sekamana Maxime, Benedata Janvier, Mucyo Fred, Onesme Twizerimana na Nshuti Innocent.

Abasimbura: Emmery Mvuyekure, Ntalibi Steven, Emmanuel Manishimwe, Rusheshangoga Michel, Mukunzi Yannick, Fabrice Nininahazwe, Fabrice Irambona, Bizimana Djihad, Bigirimana Issa, Sibomana Patrick

Roben NGABO
UM– USEKE.RW