Lion’s G Producer mushya wa Infinity

Mu minsi ishize nibwo studio ya Infinity isanzwe ikorera indirimbo abahanzi bari mu itsinda rya Active na Bulldogg iherutse kwirukana aba producers barimo Fazzo na Holy Beat. Kuri ubu babonye umu producer mushya ariwe Lion’s G.

Imwe mu mpamvu yagiye ivugwa ku kwirukanwa kw’abo ba producers, ngo ni uburyo bw’imikorere yabo itari hwitse. Irimo kuba batarubahirizaga amasaha y’akazi no kuba nta musaruro batanganga.

Byaje gutuma rero studio ya infinity isa naho iba ihagaritse ibikorwa bijyanye no gutunganyiriza abo bahanzi indirimbo bafitanye amasezerano y’imikoranire n’iyo nzu.

Amakuru dukesha ubuyobozi bwa Infinity akaba avuga ko bamaze kubona producer mushya nubwo nta masezerano y’imikoranire bari bashyiraho umukono hagati yabo.

Lion’s G yari asanzwe akorera muri studio yitwa Hood Land Music, ubu bikaba bitangazwa ko mu minsi mike aza kuba yashyira umukono ku masezerano y’imikoranire na Infinity studio.

Mukasa Jean Marie umuyobozi mukuru wa Infinity, mu minsi ishize yatangarije Umuseke ko studio ya Infinity ishaka kwita ku bahanzi bafitanye nayo amasezerano kuruta gukorera abahanzi bandi baturuka hanze.

Yagize ati “Iyo ugiye ufata buri muhanzi wese ubonye kubera ko ushaka amafaranga, usanga abo mufitanye amasezerano ibikorwa bitagenda neza kandi hari amasezerano abarengera.

Niyo mpamvu rero nka Infinity dufite gahunda yo kwita ku bahanzi dufitanye nabo amasezerano cyane kurusha abandi baturuka hanze”.

Abahanzi barimo Derek, Olivis na Tizzo bagize itsinda rya Active kimwe na Bulldogg, ni bamwe mu bahanzi barimo guhatanira irushanwa rya Primus Guma Guma Super Star5.

Joel Rutaganda

UM– USEKE.RW