Libya: Misiri yarahiriye guhiga ISIS nyuma y’uko yishe abaturage babo 21

Iki gihugu gifashe uyu mwanzuro nyuma y’uko ISIS isohoreye video yerekana abarwanyi babo bica abanyamisiri 21 b’Abakritsu mu ba Coptic babaciye imitwe. Aba bakristu bo mu ba Coptic bari barafashwe bunyago muri Libya babajyana muri Syria ari naho biciwe kuri iki cyumweru.

Muri iyi video hagaragaramo ziriya mfungwa bazishoreye bazijyanye mu butayu ahantu hanyuma abarwanyi ba ISIS bambaye imikara bakabaca imitwe babaturutse inyuma.

Mu magambo yanditse mu Cyarabu hasi muri iyo video imara iminota itanu agira ati: “Bantu b’umusaraba, namwe abakurikiye idini rishotorana ry’Abanyamisiri, murabe murora!”

Kuva iyi video yasohoka, Misiri yarahiriye guhigira hasi no hejuru abarwanyi ba ISIS aho bari hose.

President wa Misiri Abdel Fattah al-Sisi yavuze ko igihugu cye kigiye kwihorera uko bishoboka kose ku barwanyi ba ISIS  haba muri Syria cyangwa muri Libya.

Yavuze ko hazarebwa uburyo n’igihe bikwiriye ngo bihorere kuri ISIS. Gen Sissi yahise abuza abaturage be bose kuzasubira mu gihugu cya Misiri.

Abakuru b’idini ry’aba coptes (The Coptic Church) bavuze ko ibi bikorwa bitazaca intege abayoboke baryo kandi ko ikiza kizaganza ikibi byanze bikunze.

Abakoze iriya video bavuga ko bagize itsinda rya ISIS muri Libya ryitwa the Tripoli Province of the Islamic State group.

Igihugu cya Libya cyabaye isibaniro ry’imitwe y’ibyihebe kuva ubwoMuammar Gaddafi ahirikiwe n’ibihugu bikuriwe na NATO muri 2011.

Kugeza ubu  hari abanyamisiri benshi baba muri Libya bajyanywe no gushaka akazi mu nzego z’ubukungu cyane cyane mu bwubatsi.

Umwe mu barwanyi ba ISIS uvuga Icyongereza yemeje ko biteguye kuzagaba  ibitero i Rome mu Butaliyani cyane cyane ko iki gihugu byoroshye kukijyamo unyuze muri Libya.

Uyu mutwe ufite undi mugabo w’Umwarabu akaba n’Umuyahudi bafashe bakeka ko yari yoherejwe n’Urwego rw’Ubutasi bwa Israel rwitwa Mossad.

UM– USEKE.RW