Kugirira isuku akanwa birinda indwara z’imitsi n’umutima

Cardiomyopathy cyangwa se Cardiovascular Diseases  ni ijambo abaganga bakoresha bashaka kuvuga indwara zose zifata urwungano rw’imitsi n’umutima( systeme cardio-vasculaire). Abaganga bavuga ko imwe mu mpamvu zitera  izi ndwara ari isuku nke yo mu kanwa.

Umuseke  wagiranye  n’umuyobozi w’ibitaro bya Gicumbi Dr. Muhairwe Fred  adutangariza ko iyo umuntu atafite akamenyero keza ko kugirira isuku mu kanwa  ashobora guhura nibibazo kuko mu kanwa ariho hantu hakenera isuku nyinshi kurusha ahandi mu bice by’umubiri w’umuntu.

Kubera ko mu kanwa ariho ibyo turya babanza kugira ngo bitunganywe mbere yo koherezwa mu nda, iyo handuye ibijya mu nda nabyo bigenda byanduye.

Dr  Muhairwe Fred yagize ati: “Mu kanwa habamo udukoko ku buryo iyo utakagiriye isuku  duhita tumanuka tukagera mu muhogo.  Binyuze mu biribwa tuba twariye turiya dusimba dushobora kugera mu maraso atembere akagera mu mutima ndetse no mu bwonko.”

Bimwe mu bintu bituma amenyo no mu kanwa muri rusange handura ni ibinyobwa birimo amasukari menshi( inzoga ziza ku mwanya wa mbere), ibinyamavuta( amata, avoka, n’ibindi) ndetse no kunywa itabi.

Iyo abantu badafite akamenyero ko kuza  mu kanwa(amenyo, ururimi, ishinya, inkanka) ibyo bariye cyangwa banyoye bisigaramo,cyane cyane hagati y’amenyo.

Uko iminsi ishira ni nako imyanda irushaho kuba myinshi, ikabora( kubera twa dukoko twavuze haruguru tuba mu kanwa) bityo igatuma amenyo nayo abora ndetse ya mwanda ikaba yamanuka ijya mu nda.

Dr. Muhairwe Fred yemeza ko umuntu ufite akamenyero gake ko koza amenyo ageza ku myaka 20 afite udukoko duhagije mu kanwa twatuma arwara umutima. Uko agenda akura niko ibyago byo kurwara umutima byiyongera cyane.

Dr. Muhairwe Fred arasaba umunyarwanda wese kugirira isuku mu kanwa ke, mu rwego rwo kwirinda indwara y’umutima iterwa n’udukoko two mu kanwa kadasukuye.

Kubera imihihibikano yo muri iyi si, hari bamwe batabona umwanya uhagije wo koza mu kanwa gatatu ku munsi nk’uko bisabwa. Ariko wihanganye ukajya woza mu kanwa mu gitondo na nijoro mbere yo kuryama, waba wongereye amahirwe yo kurwinda kurwara ziriya ndwara cyane cyane ko twa dukoko twangiza amenyo nijoro abantu basinziriye.

Ababyeyi nabo bagirwa inama yo gutoza abana babo umuco wo koza mu kanwa mbere yo kuryama kandi bakabarinda kurya ibintu birimo amasukari bakiri bato.

Abantu bagomba kumenya ko mu kanwa hatabamo amenyo gusa. Ururimi, ishinya, inkanka, n’amenyo byose bigomba kozwa neza kugira ngo akanwa kose kabe gakeye bityo nyirako agire impumuro nziza mu kanwa ndetse n’ubuzima bwiza muri rusange.

Daddy SADIKI RUBANGURA

UM– USEKE.RW