Kubura kwa Mc Tino na Anita Pendo kuri stage byibajijweho

Mu gihe ibitaramo bya Live by’irushanwa rya Primus Guma Guma Super star ya kane byatangiraga kuwa 21 Kamena 2014, Mc Tino na Mc Anita Pendo ntibagaragaye kuri stage, bwa mbere muri iri rushanwa riri  kuba ku nshuro ya kane.

Kubura kwabo byibajijweho n’abantu basanzwe bakurikirana ibitaramo by’iri rushanwa. Bivugwa ko batakoze aka kazi uyu munsi kuko ngo baba batarahawe icyubahiro mu gihe akazi kabanje mu Ntara aribo bagakoze.

Mc Tino na Mc Anita nibo bazengurukanye n’abahanzi mu bitaramo icyenda (9) bya Playback byaberaga mu Ntara. Nyuma baza gutungurwa no kumva ko Nkusi Arthur ariwe mushyushyarugamba mukuru uba yakira abahanzi mu gitaramo cya live i Kigali.

Mc Tino na Anita Pendo kuri uwo munsi babwiye umunyamakuru w’Umuseke ko mu gihe wowe utiyubashye ngo wubahe n’akazi kawe, nta n’umwe uzakubaha.

Mc Tino na Anita bati “Mu kazi ako ariko kose ukora habamo kubahana hagati y’abo muhuje akazi ndetse n’abakoresha banyu.”

Avuga ko kuba we na mugenzi we baranze kujya kuri ‘stage’, nta yindi mpamvu ari uko bubashye umwuga bakora. Gusa atari uko basuzuguye mugenzi wabo Mc Arthur.

Tino ati “ Kuki se Lion Manzi mu zindi Guma Guma twazaga mbere ye? ni uko ari umuntu uduhagarariye mu mwuga wo kuyobora ibirori kandi umazemo imyaka myinshi cyane, bamwe yanabitangiye turi abana cyane. Mu gihe nta wundi mu Mc Bralirwa yari yashatse bajyaga kuduha icyo cyubahiro cy’uburambe dufite muri uyu mwuga”.

Ku bategura iri rushanwa, Mushyoma Joseph umuyobozi wa East African Promotors ‘EAP’ abafatanyabikorwa ba BRALIRWA mu gutegura iri rushanwa, yatangaje ko atari ugusuzugura Mc Tino na Anita, ahubwo ko habayemo icyo yakwita nko kwibagirwa.

Yagize ati “Ntabwo twigeze dusuzugura Tino na Anita, ahubwo habayemo kwibagirwa kuvugana kuri contracts bari bafite zagombaga kurangirana n’ibitaramo bya Playback, ngo tube twagirana andi masezerano y’ubufatanye no mu bitaramo bya live.

Nta mwuka mubi uri hagati ya EAP, BRALIRWA n’abo ba Mcs bombi uretse ako kabazo kabayeho gusa”.

Biteganyijwe ko mu gitaramo cya kabiri cya Live kizabera i Muhanga mu Ntara y’Amajyepfo ku wa 28 Kamena 2014, Mc Tino na Anita Pendo bashobora kuzahagaragara.

Joel Rutaganda
ububiko.umusekehost.com