Ku nshuro ya mbere se wa Platini yaje mu gitaramo cya Dream Boys

29 Werurwe 2015 – Platini, umusore umwe mu bagize itsinda rya Dream Boys, yasubiriyemo se umubyara indirimbo yo hambere ishimira umubyeyi w’umugabo wareze umwana watawe na nyina akivuka, ndetse uyu musore yarize cyane ubwo yaririmbaga iyi ndirimbo imbere ya se na murumuna we. Se nibwo bwa mbere yari yitabiriye igitaramo cya muzika y’umuhungu we.

Iri tsinda rya TMC na Platini ryamurikaga Album yabo ya gatanu bise “Nzibuka n’abandi” igitaramo kitabiriwe n’abatari bacye batashye bavuga ko banyuzwe na muzika y’aba basore babifashijwemo n’abahanzi Hope, Jay Polly, Tom Close ndetse n’abahanzi nka Knowless na Christopher bahaye ikaze Dream boys.

Aba basore baririmbye indirimbo zabo bahereye kuza cyera, bakomereza ku z’iki gihe ndetse n’izigize Album yabo nshya bamurkaga none.

Platini yaje gufata umwanya ashimira cyane se umubyara wamureze wenyine kuko uyu musore atigeze agira amahirwe yo kubona nyina.

Yavuze ko se ari ubwa mbere yitabiriye igitaramo cye. Uyu mubyeyi we yari kumwe n’umwe mu bahungu be akaba na murumuna wa Platini.

Mu ndirimbo yasubiyemo ishimira se uyu musore yarize bigaragara, ndetse bamwe bakurizaho kuvuga ko aba basore akenshi baririmba indirimbo zikora ku buzima rimwe na rimwe nabo baciyemo.

Igitaramo cya Dream Boys ni kimwe mu bitaramo byabaye byiza kuva mu ntangiriro z’uyu mwaka wa 2015.

Plaisir MUZOGEYE
UM– USEKE.RW