Ku isi hari intwaro 14,900 za kirimbuzi, u Burusiya nibwo bufite nyinshi

Ikinyamakuru The Bulletin of the Atomic Scientists  cyemeza ko isi yugarijwe cyane, kurusha ikindi gihe cyose, no kuba yashwanyuzwa n’ibisasu bya kirimbuzi ihunitse, ubu bikaba bimaze kugera ku 14, 900, ibyinshi  bikaba bifitwe n’u Burusiya bufite ibigera ku 7000.

Inama y’abahanga mu bugenge banditse muri kiriya kinyamakuru bemeza ko isi iri mu kaga k’uko inyoko muntu ndetse n’ibindi binyabuzima bishobora kuzacika ku isi haramutse hari ibisasu bya kirimbuzi bituritse kubera intambara, imitingito yabera aho bihunitse cyangwa se biramutse bigeze mu ntoki z’ibyihebe.

Mu gusuzuma ibintu bishobora kuzatuma Isi irimbuka, abahanga bavuga ibintu bitandukanye ariko cyane cyane bakavuga ko intwaro za kirimbuzi arizo ziza ku mwanya wa mbere kurusha ndetse ingaruka zikomoka ku gushyuha kw’ikirere.

Igitera abahanga impungenge kurushaho ni uko hari za Leta zimwe na zimwe zitunze ibi bitwaro kandi zifite abayobozi bafite imigirire ikemangwa.

Ibi bituma hari abagira ubwoba ko kubera impamvu runaka hari abashobora kurasa ziriya ntwaro bagamije kwihimura kubo batavuga rumwe maze nabo bakabarasaho izo batunze hakaduka intambara kirimbuzi.

Uretse Koreya ya ruguru ikunda kuvugwa cyane, abahanga banditse muri cya kinyamakuru Perezida Donald Trump ngo we unagamije kongera ubwinshi bw’intwaro za kirimbuzi  USA itunze.

Urutonde rwasohotse muri Business Insider rwerekana ko ibihugu bitunze ibingana birya:

-U Burusiya bufite intwaro za kirimbuzi 7000.

-USA ifite intwaro za kirimbuzi 6 700

-U Bufaransa bufite intwaro za kirimbuzi 300

-U Bushinwa bifite intwaro za kirimbuzi 260

-U Bwongereza bufite intwaro za kirimbuzi 215

– Pakisitani ifite intwaro za kirimbuzi 140

-Ubuhinde bufite intwaro za kirimbuzi 120,

-Israel ifite intwaro za kirimbuzi 80,

-Koreya ya ruguru ntibazi neza umubare w’izo ifite kuko ngo bigoye kumenya ibibera muri kiriya gihugu.

Jean Pierre NIZEYIMANA
UM– USEKE.RW