Knowless yabonye kompanyi bazakorana umwaka

Kuri uyu wa mbere tariki ya 27 Gashyantare umuhanzikazi Knowless Butera yashyize umukono ku masezerano y’imikoranire y’igihe cy’umwaka yagiranye na kompanyi ya Itel icuruza amatelefone.

Mu kiganiro n’abanyamakuru, uhagarariye iyi kompanyi yavuze ko impamvu bifashishije Knowless ari uko ari umwe mu bahanzi bakozeho ubushakashatsi bagasanga afite umubare munini w’abamukurikirana.

Avuga ko mu buryo bw’ubucurizi no kumenyekanisha ibicuruzwa byabo, bikazaborohera kugira ababigana benshi. Akavuga ko bitewe na gahunda bamushakaho icyo gihe cy’umwaka gishobora kuzongerwa.

Ku ruhande rwa Knowless yashimye cyane itangazamakuru mu kazi rikora ko kumenyekanisha ibikorwa by’abahanzi. Ko nta mikoranire myiza agirana naryo ibyo byiza bitamugeraho.

“Ni iby’agaciro gakomeye kuba mbafite. Ibi byose si ubushobozi bwanjye ahubwo n’ibikorwa byanjye bimenyekanishwa n’itangazamakuru noneho bikampa umusaruro nk’uyu”– Knowless

Mu myaka itanu iyi kompanyi imaze igukorera mu Rwanda, Knowless niwe ubaye ambasaderi wayo bwa mbere. Ikaba ivuga ko bitewe n’ibikorwa by’abahanzi bakora izajya igenda ishaka uburyo yakorana nabo.

Si ubwa mbere Knowless abaye ambasaderi wa kompanyi y’itumanaho mu Rwanda. Mu myaka ibiri ishize akaba yari ambasaderi wa MTN.

Photos@Evode Mugunga/UM– USEKE

Joel Rutaganda
UM– USEKE.RW