Kinshasa: Omar el-Béchir yakirijwe imyigaragambyo

Mu nama y’ibihugu yiga ku Isoko rusange rihuriwe n’ibihugu by’Afurika yo hagati n’iy’Amajyepfo COMESA, imiryo 90 ivuga ko irengera uburenganzira bwa muntu i Kinshasa yiraye mu mihanda isaba ko Perezida wa Sudani Omar el-Béchir, atabwa muri yombi.

Omar el-Béchir yageze i Kinshasa ejo kuwa kabiri ku butumire bwa Perezida Joseph Kabila kugira ngo yitabire inama ya COMESA.

Abigaragambya bavuga ko Leta ya Congo Kinshasa nk’igihugu cyasinye amasezerano y’i Rome ashyiraho urukiko mpuzamahanga mpanabyaha (ICC),  itari ikwiye gutumira umuntu nka Béchir ukekwaho ibyaha ngo ahubwo yakagombye gukorana n’ubutabera mu kumugeza mu nkiko.

Uwitwa Descartes Mpongo akaba ari umunyamabanga w’umuryango wa Gikirisitu, (Action des Chrétiens Activistes des Droits de l’Homme) ukorera muri Kivu y’Amajyepfo yagize ati “Congo igomba kugaragaza neza uruhande irimo niba ari urw’inzirakarengane cyangwa umunyabyaha.”

Omar el-Béchir yashyiriweho impapuro zo kumuta muri yombi kuva hagati ya 2009 na 2010, ICC ikaba umurega kugira uruhare mu byaha byibasiye inkomuntu, ibyaha by’intambara na jenoside ngo yaba yarakoze mu gace ka Darfour, mu Burengerazuba bw’igihugu cye.

Kuva izo mpapuro zashyirwaho, uyu muperezeida ntiyahwemye gutembera mu bihugu by’Afurika ariko ntihagire n’umutunga agatoki.

Muri iyi nama y’i Kinshasa u Rwanda ruhagarariwe na Minisitiri w’Intebe Dr. Pierre Damien Habumuremyi.

Amakuru ava i Kinshasa aravuga ko abandi bakuru b’ibihugu byo mu karere ka COMESA barimo uwa Ouganda,  Zambia, Djibouti, na Zimbabwe baraye muri uwo mujyi na ho inama yo yatangijwe kuri uyu wa gatatu na Perezida Joseph Kabila.

ububiko.umusekehost.com