Kigali: Ambasaderi wa USA yagaye ko iwabo hakiri ivanguraruhu

Ejo mu birori byo kwizihiza umunsi w’ubwigenge bwa USA ku nshuro ya 239, Ambasaderi wa USA mu Rwanda Erica J, Barks- Ruggles yakiriye Abanyarwanda bo mu nzego zitandukanye bari baje kwifuriza umunsi mwiza inshuti zabo z’Abanyamerika, aboneraho kugaya ko muri USA hakiri abantu barasa bagenzi babo babaziza uko uruhu rwabo rusa.

Erica J.Barks-Ruggles yavuze ko  kuba hari abantu cyane cyane abapolisi bifata bakarasa Abirabura kandi binyuze mu nziza zidateganywa n’amategeko ari ibintu bidakwiriye.

Muri USA hamaze iminsi havugwa abapolisi barashe abirabura urugero nko muri Ferguson ndetse n’umusore w’Umuzungu aherutse kwinjira mu rusengero arasa abirabura basengaga.

Ibi byose kuri Ambasaderi Erica ngo ni ibintu bidakwiriye kandi bigomba kubera Abanyamerika uburyo bwo kwicara bakareba ikibitera bakakigorora hakiri kare ku bw’inyungu z’abana babo bazaragwa igihugu ejo hazaza.

Yagize ati: “Kuba hari abapolisi bakirasa abirabura nko mu mujyi wa Ferguson, Missouri  ndetse n’uherutse kurasira  abirabura muri Kiliziya muri Carolina y’Epfo, bitwereka ko twebe nk’abaturage akazi kacu katararangira.”

Ku rundi ruhande ariko, Amb. Erica J.Barks-Ruggles yashimye ko mu gihugu cye abaturage bishyira bakizana ndetse buri wese akaba yemerewe gukunda no kubana n’uwo ashaka.

Ibi abivuze nyuma gato y’uko Urukiko rw’Ikirenga rwa USA rwemereje ku mugaragaro ko gushakana kw’abahuje ibitsina byemewe muri Leta zose zigize USA.

Ambasaderi wa USA mu Rwanda yashimye intambwe u Rwanda rumaze gutera mu nzego zitandukanye kandi asezeranya ko ubufatanye hagati y’ibihugu byombi buzakomeza kugira ngo iri terambere  rikomeze.

Mu ijambo rye Erica yashimye ko ubu mu Rwanda hari demokarasi n’icyerekezo kitajegajega.

Minisitiri w’Ububanyi n’Amahanga w’u Rwanda Louise Mushikiwabo wari muri ibi birori na we yashimye ko ibihugu byombi bibanye neza kandi atsindagira ko ibyagezweho mu myaka 21 ishize ari indashyikirwa.

Yashimiye kandi yifuriza  abayobozi n’abaturage ba USA  aho bari hose ku Isi kwizihiza neza umunsi wabo w’ubwigenge.

Min Mushikiwabo yibukije abari aho ko imibanire y’ibihugu byombi igomba gukomeza kongerwamo ingufu cyane cyane mu bucuruzi no mu kurinda umutekano.

Kuri we ngo ibi ni byo bizatuma abaturage b’ibihugu byombi babaho batuje.

USA ni  kimwe mu bihugu byagize uruhare runini mu gufasha u Rwanda kwiyubaka mu nzego zitandukanye kuva Jenoside yakorewe Abatutsi muri 1994 ihagaritswe. Inkunga yayo yibanda cyane mu nzego z’uburezi, ubuzima, iterambere ry’ubukungu n’ibindi.

Amafoto/NTEZIRIZAZA/UM– USEKE

Théodomir NTEZIRIZAZA
UM– USEKE.RW