Kicukiro: Ahitwa Kajeke barashaka ko amazi yabo atunganywa

Ni mu Karere ka Kicukiro mu Murenge wa Kanombe, Akagali ka Kabeza. Ni agace kari mu gishanga kiri hagati ya Nyakabanda ya Kicukiro na Sahara  nayo ya Kicukiro. Abaturage bahatuye bwabwiye Umuseke ko bababazwa no kuba bafite amasoko y’amazi(fountains) ariko bakanywa amazi adasukuye kandi kuba bayafite byaba imbarutso yo kuba bafite amazi meza kandi ahoraho.

Bizimana Theodore ni umugabo ukuze wabaye muri aka gace kuva yavuka. Yayoboye aka gace kuva muri 1986 kugeza ubu, yabwiye Umuseke ko ikibazo gikomeye abaturage bafite ari amazi mabi bavoma, bakayakoresha imirimo yabo ya buri munsi.

We hamwe n’abandi twaganiriye bemeza ko Leta ibafashije igatunganya ariya masoko, byafasha buri wese utuye muri kariya gace cyangwa agaturiye, akabona amazi meza yo gukoresha, bikarinda abana kurwara indwara ziterwa n’amazi mabi.

Inkomoko y’izina ‘KAJEKE’:

Bizimana yatubwiye ko ijambo Kajeke ari ijambo abanyarwanda baremekanyije barivanye ku Gifaransa Centre d’Animation de la Jeunesse de Kanombe bitaga ishuri ry’imyuga ryashinzwe na Ndayambaje Bernard muri 1964.

Muri iri shuri bigiragamo imyuga iciriritse harimo kudoda no kubaza. Nyuma uko abantu bagiye batura hafi y’iryo shuri, hose hiswe Kajeke, bakomoza kuri ririya shuri.

NIZEYIMANA  Jean Pierre

UM– USEKE.RW