Kenya: Aborozi bigabije amazu ya ba mukerarugendo baratwika

Kuri wa gatandatu aborozi bo muri Kenya batuye mu gace k’imirambi kabamo ubwatsi  bwo kuragiramo badutse mu macumbi ya ba mukerarundo barayatwika ubundi bashumura inka zabo mu bibanza biri aho kugira ngo zirishe.

Kenya iri mu bihugu bisurwa nab a mukerarugendo benshi mu karere kubera imirambi yayo no kuba ifite amoko y’inyamaswa zidapfa kuboneka henshi muri Africa.

Nubwo isurwa ariko, hari aborozi b’amatungo maremare batishimira ko ba mukerarugendo bigarurira amasambu runaka babifashijwemo na Leta bakubakamo amacumbi bityo bigakumira amatungo kurisha.

Kubera uko kutishimira ibi, bamwe mu borozi ejo bigabije amacumbi baratwika, barasahura barangije bahuramo inka ngo zirishe ubwatsi bwaho kandi ibi Leta ntibyemera.

Umwe mu bari ba mukerarugendo witwa Anne Powys yabwiye BBC ko hari abasore b’inkorokoro baherutse kugabiza inka zabo mu isambu yabutsemo inzu za nyakatsi(ariko ngo ziba zirimo ibikenewe by’ibanze kuri mukerarugendo)zirarisha ahatse kubakumira bamutera ubwoba bwinshi.

Uyu mugore avuga ko bishoboka cyane ko ababikora batabiterwa cyane cyane no kubura urwuri ahubwo ngo harimo n’ingengabitekerezo za politiki binjijwemo n’abanyapolitiki b’abahezanguni.

Ibi ngo bikorwa n’aborozi bo mu bwoko bw’aba Masai, Pokot n’aba Samburu.

Uru rugomo bivugwa ko rukorerwa ba mukerarugendo baba bazamara igihe mu Kenya ruje mu gihe iki gihugu kitegura amatora y’Umukuru w’igihugu azaba mu mezi make ari imbere.

Agace ka Laikipia gatuwemo n’aba Masai ni agace k’umurambi harimo ubwatsi bw’umukenke kandi buke k’uburyo hadafashwe ingamba zo gukumira ubwinshi bw’amatungo aharisha, kazahinduka ubutayu.

Umwe mu borozi yabwiye BBC ko ibyo bakora babiterwa n’uko agace batuyemo kagenda kaba ubutayu bityo bakagenda basahakisha aho inka zabo zakura ubwatsi n’amazi yo gushoka.

Ubu ngo ahakundaga kugaragara imbogo n’inzovu zije gushoka, hagaragara inka, bigatuma ba mukerarugendo bagabanuka.

Inzovu ngo ziri gupfa kubera kubura ubwatsi n’amazi cyangwa se zikicwa naba rushimusi baba bashaka amahembe yazo ahenze cyane.

Mu minsi ishize umunyapolitiki utavuga rumwe na Leta ya Kenya Raila Odinga yasabye abayoboke be kuzitabira amatora ari benshi bagatsinda Jomo Kenyatta n’ishyake rye mu matora y’Umukuru w’igihugu kandi ngo nibadatsinda bizaba byatewe n’ubujura bw’amajwi.

Ibi ngo bizakurikirwa n’ingaruka mbi atavuze izo arizo.

Muri 2007 muri Kenya habaye amakimbirane ashingiye ku moko na Politiki nyuma y’uko Raila Odinga atsinzwe amatora y’umukuru w’igihugu.

Kuri iyi nshuro ntawamenya uko bizagenda ariko uko bigaragara bishobora kuzamera nk’uko byagenze muri 2007 na 2008 niba abanyapolitiki batemeranyijwe ku byavuye mu matora.

Jean Pierre NIZEYIMANA
UM– USEKE.RW