Kenya: Abaturage bazajyana imbeba nzima 200 mu myigaragambyo

Iki gikorwa kiswe (Operation Ondoa Panya, bivuze Kwirukana imbeba) abigaragambya bazazana imbeba mu myigaragambyo bita iy’Amahoro.

Abaturage barigaragambiriza icyemezo cyafashwe n’akarere ka Ruring’u muri Kenya, cyo kubaka ahantu hagezweho hazakorerwa ibikorwa binyuranye nko gukora massage, piscine n’ibindi bizatwara miliyoni 75 z’Ama Shilling yaKenya ($740,000; Frw 510, 000, 000).

Umwe mu bateguye iki gikorwa, John Wamagata yavuze ko bidakwiye ko ako karere kari kubaka igikorwa nk’icyo cyo kwidagadura gihenze mu gihe hagikenewe ibindi bikorwa remezo by’ibanze.

Wamagata ati “Tuzazana imbeba 200 tuzishyire mu mujyi. Kurarikira gushyiraho Sauna Club (ahantu ho kwikandira) ni ko gashya ubuyobozi bwakuye mu ngendo bwiribwamo hanze?”

Yanavuze ko bazarwanya imigambi yo gutera icyizere Umuyobozi witwa Nderitu Gachagua wifatanyije n’abaturage kwamagana icyo cyemezo cyo kubaka aho hantu hiswe aho kubaka ubuzima (Health Club).

Wamagata yongeho ati “Ayo mafaranga akwiye gushyirwa mu bigo by’imari iciriritse bigenewe urubyiruko, nibo bagomba kuyiguriza bagatangira imirimo ibyara inyungu. Ibi byagabanya ubushomeri kandi bigafasha benshi, atari ukureba agatsiko k’abantu bake, ku giti cyabo.”

Yasabye abayobozi b’akarere ke gukora imishinga yo kugeza amazi meza ku baturage bakajya babasha kogera iwabo aho kujya muri piscine yagenewe abifite.

Inteko y’akarere yemeje umushinga wo kubaka aho hantu ho kuryohereza ubuzima, ariko birwanywa cyane n’umuyobozi w’umujyi wa Nyeri uri muri ako gace.

Nderitu Gachagua uyobora umujyi wa Nyeri, yagiriye inama abo muri komite yemeje uyu mushinga kujya kogera mu migezi y’iwabo kandi bagakandwa n’abagore babo.

Aha hantu ho kuryohereza ubuzima ku bagize Inama y’Umujyi wa Nyeri, hazaba hafite aho gukorera siporo ngororamubiri (gymnasium equipment), ahantu ho kogera amazi ashyushye (Steam bath), aho kwikandishiriza (Massage parlour), n’aho kogera (Swimming pool and sauna).

Gachagua avuga ko uyu mushinga ari ugukoresha amafaranga ya rubanda nabi.

The Star

UM– USEKE.RW