Karongi: Abubaka agakiriro k’akarere bamaze amezi 3 badahembwa

Abakozi ba rwiyemezamirimo wubakisha agakiriro k’akarere ka Karongi baherutse gukora imyigaragambyo kuri iyi nyubako  bamushinja  kumara amezi atatu nta mafaranga abaha kandi yari yarabijeje kujya abahemba mu gihe cy’iminsi 15, buri gihe batora umurongo ku biro by’akarere baje kurega rwiyemeza mirimo badaheruka kubona.

Sekamana  Charles umwe mu bakora akazi ko gufasha ababuka (aide mancon) yabwiye Umuseke ko aho bigeze  basigaye bajya mu ngo za bo bakarekera aho.

Yagize ati “Ese wowe wazinduka ubwiye umugore ko ugiye ku kazi, ukwezi kugashira ukundi ku gataha nta haho umuzanira ugataha nawe witwa umugabo?  Twitwikira ijoro ngo batatubaza iposho kandi dukora tudahembwa, wagirango turi mu gihano rwose.”

Umuyobozi w’akarere ka Karongi Ndayisaba Francois yatangarije Umuseke yakoranye inama n’abayobozi b’akarere bungirije bigira hamwe ikibazo basanga impamvu uyu rwiyemezamirimo yambura abaturage ari na ko  adindiza imirimo, igihe cyo kwishyuza kikagera  nta gikorwa yerekana

Ati “Yari yaratinze kuzana fagitire, ariko ubu yamaze kuyizana kandi abashinzwe imari (Finance) baramusinyiye kugira ngo aba bakozi bahembwe.”

Ndayisaba yanenze abakozi bagira akarengane bakinumira kandi bagakora nta masezerano y’akazi bagira yabarenganura mu gihe bagize ibibazo nk’ibi.

Yasabye ba rwiyemezamirimo kujya bishyira mu kimbo cy’abakozi bakoresha kandi, ngo ahanini  aba bakozi baba ari ba ntaho nikora, yongeraho ko mu gihe rwiyemezamirimo azajya yambura abakozi bishobora kujya bimuviramo no kwamburwa isoko yari afite maze rigahabwa undi wemera kubahirirza ibikibiye mu masezera abaya giranye n’akarere.

Ibi bibaye mu gihe no mu kagari ka Burunga ho mu murenge wa Bwishyura na ho  rwiyemezamirimo yahingishije abaturage ibiti byitwa boberi ababwira ko azabagurira maze  umusaruro waboneka agahita akuramo ake karenge  ntibongera ku muca iryera.

NGOBOKA Sylvain
UM– USEKE