UNR yatanze impamyabushobozi z’icyubahiro

HUYE-  Kaminuza nkuru y’ u Rwanda yatanze impamyabushobozi z’icyubahiro ku banyapolitike bakaba n’abadipolomate babiri aribo: Kamalesh Sharma  wahoze ari umunyamabanga mukuru w’ihuriro ry’abavuga ururimi rw’icyongereza (commonwealth) na Amb. Juma Mwapachu wahoze ari umunyamabanga mukuru w’umuryango w’ibihugu byo mu burasirazuba bwa Afurika (EAC).

Abo bagabo bombi bakaba bahawe impamyabushobozi z’icyubahiro muri politiki n’ubuvuganganzo. Izi mpamya bushobozi z’icyubahiro bakaba bazishyikirijwe mu mihango yo gutanga impamyabushobozi ku banyeshuri barangije muri kaminuza nkuru y’u Rwanda   3 391 muribo 1 070  ni igitsina gore bakaba barangije mu mashami atandukanye.

Mu ijambo yagejeje kubari aho, umuyobozi mukuru wa kaminuza y’u Rwanda, Prof. Silas Lwakabamba yavuze ko izi mpamyabushobozi z’icyubahiro ari ikimenyetso cyo kubashimira uruhare bagize mu iterambere ry’isi muri rusange.

“Bose bagize uruhare mu guteza imbere uburezi, bose bafite ibitekerezo biganisha ku iterambere, bose baharaniye uburenganzira bw’ikiremwamuntu, kurwanya ivangura ndetse bose ni inshuti z’u Rwanda”. Lwakabamba

Mu ijambo rye Sharma  yavuze ko ashimijwe cyane ni icyubahiro ahawe kandi avuga ko Common Wealth izakomeza gukora ibishoboka byose bigamije iterambere rirambye.

Naho Amb. Mwapachu yashimiye  Kaminuza nkuru ku cyubahiro imuhaye anayishimira cyane ku ruhare rwayo mu iterambere ry’igihugu ndetse n’akarere muri rusange.  Ati: “ndashimira cyane Kaminuza y’u Rwanda ku ruhare  igira mu gutegura abahanga bo kubaka igihugu igendeye kuri burere n’ubumenyi.”

Iyi ikaba ari inshuro ya kabiri Kaminuza y’u Rwanda itanze impamyabushobozi z’ikirenga mu mateka yayo, iziherutse zikaba zarahawe Mme Sadako Ogata wahoze ari umuyobozi w’ishami ry’umuryango w’abibumbye rishinzwe impunzi(UNHCR).

INEZA Douce
UM– USEKE.COM