Kwibohora bitwibutsa inshingano dufite yo kubaka imibereho twifuza- Perezida Kagame

Mu ijambo yagejeje kubari bitabiriye imihango yo kwizihiza isabukuru y’imyaka 19 u Rwanda rumaze rwibohoye yanahujwe na gahunda zo kwizihiza isabukuru y’imyaka 51 u Rwanda rumaze rwigobotoye ubutegetsi bwa gikoroni n’imyaka 50 umuryango wa Afurika yunze ubumwe ubayeho, Perezida Kagame yavuze ko kwizihiza ibyo byose byongera kwibutsa Abanyafurika n’Abanyarwanda by’umwihariko ko bagomba guhera kubyo bafite bakiyubakira ejo hazaza habo kandi bagaranira kwigira no kwihesha agaciro.

Ibi birori byabereye mu kigo cya gisirikare cy’i Kami, kiri mu mudugudu wa Kami, Akagari ka Gasharu, umurenge wa Kinyinya mu Karere ka Gasabo  hari hakoraniye abaturage bo mu midugudu 11 ikikije uyu mudugudu.

Abayobozi bo mu nzego zo hejuru barimo muri ibi birori byitabiriwe kandi Perezida wa Repubulika Paul Kagame na Mme Jeannette Kagame, Minisitiri w’intebe Dr Pierre Damien Habumuremyi, abayobozi bakuru mu nzego za gisirikare n’izindi nzego z’umutekano, Umuyobozi w’umujyi wa Kigali Fidel Ndayisaba, Umugaba mukuru w’ingabo za Burkina Faso Général Nabéré Honoré Traoré n’abandi.

Perezida Kagame bigaragara ko yakiranywe urugwiro n’abaturage bo muri aka gace, yatangiye ijambo rye abifuriza isabukuru nziza y’imyaka 19 u Rwanda rwibohoye. Yavuze ko mu gihe hizihizwa uyu munsi Abanyarwanda bakwiye kujya bikuka inshingano yo kubaho, kubaho neza, kwigira, kwiha no kugira agaciro, ibyo kandi ngo bikuzuzwa mu nshingano rusange basangiye n’abandi Banyafurika.

Yagize ati “U Rwanda rufite amateka yarwo ariko amateka yarwo ntatandukana cyane n’amateka y’abandi banyafurika, n’ubwo u Rwanda rufite n’amateka y’umwihariko, amateka yacu y’umwihariko ahuza itariki ya mbere y’uku kwezi n’itariki ya kane y’uku kwezi (ubwigenge no kwibohora).”

Perezida Kagame kandi yavuze ko uwakwibaza aho ibi byombi bitandukaniye cyangwa icyo bivuze, akwiye kumenya ko byombi ari intambwe ebyiri zatewe imwe yuzuza indi, byombi biganisha Abanyarwanda ku gushobora kubaho, kwibeshaho uko bakwiriye kubaho n’uko babyifuza, ndetse ngo ntibikwiye kujya bigira abandi bivuna babyibazaho, ahubwo bakwiye kubirekera Abanyarwanda.

Umukuru w’Igihugu yavuze ko ayo mateka yose n’izo ntambwe ebyiri, ziterwa mu buzima bw’u Rwanda, Abanyarwanda badakwiye kwemera kurebera ibijyanye n’ubuzima bwabo.

Agira ati “Abanyarwanda ntibakwiriye kuba indorerezi ku bijyanye n’uko bazamera ejo hazaza, nicyo cya mbere cyabanje kwica u Rwanda, aho babanje kuba indorerezi.”

Perezida Kagame akomeza avuga ko itariki ya Kane (4) Nyakanga ari intambwe yiyongereye kw’itariki ya mbere Nyakanga kandi ngo ni itambwe ikomeye yibutsa kandi igaha inshingano Abanyarwanda yo kuvuga ngo “Ntibishoboka” ko bakomeza kubaho  nk’indorerezi.

Ibi kandi ngo bikaba bireba buri Munyarwanda wese umuto, umukuru, umugore n’umugabo kuko uko batera intambwe mu majyambere akiri macye ariko ashimishije, uko bagenda babigeraho ari nako bikwiye kubibutsa ko imbere hari ibindi byinshi bakwiye kugeraho, ariko batazabigeraho bakomeje kuba indorerezi, ahubwo ngo bazabigeraho bakomeje umuhate wo kwigira no kwihesha agaciro.

Perezida Kagame kandi yongeye gusaba Abanyarwanda gufatanyiriza hamwe bakarinda ibyo bagezeho ndetse bakarinda icya bihungabanya. Gusa ibi ngo birasaba Abanyarwanda gukora bidasanzwe kandi bagafatira urugero ku mateka y’igihugu kuko ngo ibyayabayemo byigisha gukora ku buryo budasanzwe, kugira ngo bahangane n’ibibazo bagomba gukemura.

Perezida Kagame yanavuze ko amateka yibukwa uyu munsi yibutsa ko Abanyarwanda bari mu nzira idasanzwe, aho buri Munyarwanda agomba gufatanya n’undi bakubaka igihugu basangiye ku buryo bungana, ntawuhejwe, ntawusubijwe inyuma, ntawubujije undi ijambo.

Ati “Abana b’u Rwanda bakiga bakageza igihugu ku mutungo gikwiye kuba gifite, Abanyarwanda bakagira ubuzima bwiza, bakigaburira bakihaza ndetse bakanasagurira amasoko, bakubaka ibikorwa remezo, bagakoresha ubwenge, umutungo w’igihugu n’imbaraga z’amaboko bafite bakagera kubyo bifuza, nk’iby’abandi bashoboye kugeraho.”

Ibi ngo bizagerwaho Abanyarwanda babanje kwimenya no kumenya abana babo bakabakunda, bakabaha imbaraga, bakabaha uburyo n’ibindi.

Asoza ijambo rye yashimiye Abanyarwanda bose ku bikorwa n’imikoranira bya buri munsi, bigaragara ko bamaze kurenga ibyabaca intege, ibyacamo ibice, aho buri wese yumva afite inyungu kuri mugenzi we.

Perezida Kagame kandi yanatashye ikigo cya gisirikare cya Kami cyasanwe ku bwitange bw’ingabo z’u Rwanda, asura n’umudugudu uri i Gishari ahazatuzwa imiryango y’abatishoboye bacitse ku icumu rya jenoside yakorewe Abatutsi igera ku 150, n’abimuwe ahantu hashobora kwibasirwa n‘ibiza.

Photos: PPU

Vénuste Kamanzi
UM– USEKE.RW