Kami Kabange yafashije REG BBC kugera muri ½ cy’irushanwa ry’Intwari
Mu mpera z’iki cyumweru REG BBC yatsinze Patriots BBC mu mikino y’amatsinda
Imikino y’amatsinda y’irushanwa ‘National Heroes Tournament 2017’ yasojwe kuri iki cyumweru. Amakipe ahabwa amahirwe yo kuryegukana; Espoir BBC, Patriots BBC na REG BBC ya Kami Kabange itaratsindwa yageze muri ½.
Kuwa gatanu tariki 27 Mutarama 2017 hatangijwe irushanwa rihuza amakipe yo mu Rwanda muri Basketball rigamije kuzirikana intwari z’u Rwanda ziri mu byiciro bitatu; Imanzi, Imena n’Ingenzi.
Iri rushanwa ryiswe ‘National Heroes Tournament 2017’ ryabayemo imikino ikomeye yanarebwe n’abakunzi ba Basketball benshi, nk’uwo Patriots BBC yatsinzemo APR BBC amanota 53-26, n’uwo Espoir BBC yatsinzemo IPRC-Kigali BBC amanota 76-60.
Umukino wari utegerejwe na benshi mu matsinda wabereye kuri petit stade mu ijoro ryo kuwa gatandatu tariki 28, urangira REG BBC itsinze Patriots BBC yatwaye igikombe cya shampiyona giheruka amanota 68 – 39.
Uyu mukino umukinnyi mushya REG BBC yavanye muri City Oilers yo muri Uganda Kami Kabange yatsinzemo amanota 22 menshi kurusha andi yatsinzwe n’umukinnyi umwe muri iri rushanwa. Uyu mugabo yabwiye Umuseke ko iyi ari intangiriro nziza kandi bizamufasha mu mikino iri imbere.
Kami yagize ati: “Uko nasize Basketball y’u Rwanda siko nyisanze. Nishimiye kubona abafana bitabira imikino nk’iyi itari na shampiyona. Nishimiye kubona urwego abakinnyi bariho. Kandi nishimiye gutangira neza mpesha intsinzi ikipe yanjye nkanigaragaza mu mikino ikomeye. Nifuza gutwara iki gikombe kuko byadufasha kwigirira ikizere no mu mikino itaha ya shampiyona.”
Imikino ya ½ iteganyijwe kuwa gatatu tariki 1 Gashyantare 2017. Uko izakurikirana;
- Saa 14h Ubumwe BBC vs THE Hoops RW G.T (Petit Stade Amahoro)
- Saa 16h REG BBC vs IPRC Kigali (Petit Stade Amahoro)
- Saa 18h Espoir vs Patriots (Petit Stade Amahoro)
Muri iyi mikino kwinjira ni 1000frw hejuru muri stade na 3000 muri VIP hasi.
Roben NGABO
UM– USEKE
English