Kambale Gentil wifuzwaga na AS Kigali yongereye amasezerano muri Etincelles FC
Kambale Salita Gentil wafashije Etincelles FC umwaka ushize yayisinyiye indi myaka ibiri
Rutahizamu Kambale Salita Gentil yongereye amasezerano muri Etincelles FC. Iyi kipe bivugwa ko yamuhaye miliyoni enye za ‘recruitement’ ngo irifuza kongerera amasezerano abeza isanganywe mbere yo kugura abandi batandatu.
Kuri uyu wa kane tariki 22 Kamane 2017 nibwo Etincelles FC yatangiye kubaka ikipe bazakoresha mu mwaka utaha w’imikino. Ubuyobozi bw’iyi kipe y’i Rubavu bwatangiye gusinyisha bamwe mu bakinnyi bitwaye neza muri shampiyona y’umwaka ushize.
Kambale Salita Gentil usanzwe ari kapiteni wabo niwe wari inking ya mwamba yatumye Etincelles FC isoreza ku mwanya wa karindwi (7) umwanya mwiza kurusha indi yagize mu myaka irindwi ishize.
Uyu mugabo watsindiye Etincelles FC ibitego 14 muri shampiyona niwe bahereyeho bongerera amasezerano. Yasinye imyaka ibiri nkuko Umuseke wabitangarijwe n’ukuriye akanama gashinzwe ‘recruitment’ muri Etincelles FC.
Vincent Ndaribumbye yagize ati: “Turifuza guhera ku bakinnyi batanu basanzwe babanzamo barangije amasezerano. Gentil yasinyiye rimwe na Mumbele Saiba Claude bakorana mu busatirizi. Basinye imyaka ibiri kuko twishimiye umusaruro baduhaye muri shampiyona dusoje. Nitumara kugumana abo twifuza nibwo tuzajya ku isoko gushaka abandi nka batandatu (6) badufashak kugera ku zindi ntego.”
Abakinnyi batanu bari barangije amasezerano umutoza Ruremesha Emmanuel abona bashobora kumuufasha kujya mu myanya itanu ya mbere ni; Kambale Salita Gentil, Mumbele Saiba Claude, Mugenzi Cedric bita Ramires, Mobonda Galomosa Guillain na Nahimana Isiaka.
Kambale Salita Gentil yongereye amasezerano kandi byavugwaga ko yifuzwa n’amakipe atandukanye nka AS Kigali na Mukura VS.
Roben NGABO
UM– USEKE
English