Jimmy Mukubya yamaze kwemeranywa n'ikipe ya Rayon Sports

Myugariro Jimmy Mukubya yamaze kwemeranya na Rayon Sports kuyikinira, agomba gushyira umukono ku masezerano y’imyaka ibiri muri iyi kipe ku gicamunsi cya none nk’uko umutoza Didier Gomes yabitangarije UM– USEKE.

Uyu musore wavuye mu ikipe ya Sports Club Villa muri Uganda yageze i Kigali kuwa gatanu ushize, ubu igisigaye ni ibaruwa (Release letter) imwemerera gukinira Rayon Sports iyi ikazava mu ikipe yabarizwagamo ya Villa SC muri Uganda.

Myugariro Myugariro aje ari igisubizo kuri Rayon Sports kuko yari imaze igihe yaravunikijije umukinnyi Usengimana Faustin akazanamara shampiyona yose ataragaruka mu kibuga kubera iyo mvune.

Umutoza Didier Gomes Da Rosa yatangarije UM– USEKE ko nta wundi myugariro akeneye kuva yamaze kuzana Jimmy Mukubya yagize ati “Myugariro umwe arahagije.”

Ikipe ya Rayon Sports yari imaze iminsi iri mu igerageza ry’abandi bakinnyi bashya nka Nicolas Junior Mukimbiri, uyu munsi abakinnyi bose bagomba gutangira imyitozo nyuma y’akaruhuko ka bonane bari bamaze iminsi barimo.

Umutoza Gomes yagize icyo atangaza kuri rutahizamu Nicolas Mukimbiri, yagize ati “Ni rutahizamu w’umuhanga, ahagarara neza mu kibuga gusa aracyafite ikibazo cy’imyitozo idahagije (retard physique), nimugumana agomba gukora cyane kugira ngo ajye ku rwego rw’abandi.”

Ikipe ya Rayon Sports ubu irimo kwiyubaka mu rwego rwo gutegura umukino uzayihuza n’ikipe ya FC Leoprads mu marushanwa yoguhatanira igikombe cy’amakipe yabaye ayambere iwayo muri Afurika (Champions League), umukino ubanza uteganyijwe tariki ya 7 Gashyantare i Brazzaville.

JD Nsengiyumva Inzaghi
ububiko.umusekehost.com