JF Losciuto yavuze ibyatumye ava muri Rayon Sports

Jean Francois Losciuto wari umutoza mukuru wa Rayon Sports hashize icyumweru avuye muri iyi kipe ajya muri Burkina Faso mu ikipe ya ASFA Yennanga aho yashyize umukono ku masezerano y’imyaka 4. Kuri iki cyumweru yatangarije RuhagoYacu ko ubukene bwatumye ava muri iyi kipe y’i Nyanza.

Yagiye nyuma y’amezi abiri gusa asinyeku masezerano y’umwaka umwe muri Rayon Sports, byaratunguranye.

Nyuma y’igihe yaranze kugira icyo atangaza, Jean Francois Loscito uri i Ouagadougou yemeye gusubiza bimwe mu bibazo byatumye ava mu ikipe ya Rayon Sports.

Mbere na mbere uyu mubiligi yabanje kugira ati: ” Kuri uyu wa gatandatatu namaze kwandika ibarwa isezera mu ikipe ya Rayon Sports. Nta byinshi mfite byo kubabwira, gusa icyo mwamenya, ni uko mu masezerano yanjye, harimo ubwumvikane ko igihe nshatse nazafata inzira nkagenda, biri mu masezerano.”

Umuyobozi wungirije wa Rayon Sports, Gakumba yatangarije Radio 10 kuri uyu wa gatandatu, ko igihe uruhande rumwe rusheshe amasezerano rugomba kugenera urundi ibihumbi 4 by’amadorali ($ 4 000) kongeraho umushahara umutoza yahembwaga, ungana nawo n’ibihumbi 4 by’amadorali.

Jean Francois Losciuto agira icyo avuga kuri ibi yagize ati: ” Ibyo ntabwo ari ko bimeze, icyo nzi cyo ni uko ngomba ikipe ya Rayon Sports, ibihumbi 4 by’amadorali, kandi ngomba kuyishyura, kuko biri mu masezerano, ibindi si ukuri, kuko nabonye haragiye havugwa byinshi ku kugenda kwanjye by’ibinyoma.

Ikintu nabamenyesha ni uko bimbabaje cyane kuva muri iyi kipe ya Rayon Sports, nari maze kubaka umubano mwiza n’abakinnyi ba Rayon Sports, ikindi Rayon Sports ni ikipe ifite abakunzi bayikunda koko, mbona ari aba mbere muri Africa, birambabaje gutandukana na bo, tutamaranye igihe.”

Uyu mutoza avuga ko nta muntu yigeze agirana ikibazo na we muri Rayon Sports, ariko ikibazo cy’amikoro n’ubushobozi bucye kiri mu bitumye ava muri iyi kipe imbura gihe.

Akomeza ati: ” Nahembwaga koko ibihumbi 4 by’amadorali, ariko ndakubwiza ukuri ko, ukwezi kwa 1 muri Rayon Sports batabashije kumpa amafaranga yuzuye, ukwezi kwa 2 bakererwaho iminsi 6 kumpemba, ntangira kugira impungenge zikomeye.

Ndi umugabo ufite umuryango, nababajwe no kubona bamwe batangaza ko naba naribye laptop (mudasobwa igendanwa), kuko njye barabazi nari mfite I pad na mudasobwa zanjye, ntago ibyo nata n’umwanya mbivugaho.”

No kuba bampa T Shirt yo kwambara mu myitozo nta byo bakoze, kuki bamwe bavuga uko? Uzababaze uwajyaga agura ibiryo by’abakinnyi rimwe na rimwe? Natanze amafaranga ku bwanjye inshuro zingahe ngo abakinnyi babashe kurya?

Nishyuye imiti y’abakinnyi ku giti cyanjye, ibyo ntago babizi? Muzabaze Fuadi. Nahaye amafaranga Govin ngw’abashe kujya gushaka ibyangombwa, ibi ntago babizi? None barandenga ngo kwiba mudasobwa? Barekere aho kubeshya abafana.”

Barekere aho kubeshya abakinnyi n’abakunzi b’ikipe. Nabasaba mbere na mbere gukemura ibibazo by’abakinnyi kuko ni abasore bubaha kandi bihangana.”

Losciuto avuga ko ikipe iri mu bibazo bikomeye by’amikoro, ikibazo abayobozi badashaka kubishyira ahagaragara, ngo bishakirwe igisubizo mu buryo bushoboka.

Avuga ko amahirwe yari abonye yo kugira amasezerano meza mu ikipe ya ASFA Yennanga atari kuyareka kuko ari uko bigenda mu buzima.

Uyu mutoza avuga ko yagize ibihe byiza mu Rwanda, abakunzi b’ikipe ya Rayon Sports bari babanye neza, ndetse atanabyicuza.

Losciuto ati : ” Mwamenya rwose ko nagize ibihe byiza mu Rwanda, kandi nzahora nibuka ibyiza nahuye na byo mu Rwanda, kuruta ibitari byiza nahabonye. Gutandukana birumvikana ntabwo biba byiza, ariko nta kundi ubuzima burakomeza.”

Uyu mutoza akavuga ko n’ubu atumva uburyo ikipe ifite abakunzi nka ba Rayon Sports bayikunda nyabyo, iba mu bibazo by’ubukene nk’ibyo yayibonyemo.

Agira ati: ” Nagize amahirwe yo gusura amasitade menshi cyane, nzi n’amakipe menshi yaba muri Africa ndetse n’i Burayi, ariko ndababwiza ukuri, abakunzi ba Rayon Sports nabashyira muri batatu ba mbere, mu bakunda ikipe yabo nyabyo, mu makipe nzi yose ku isi.

Icyiza ni uko bareka kubabeshya, ahubwo bakababwiza ukuri uko ibintu byifashe mu ikipe. Bafite uburenganzira bwo kumenya ibibera mu ikipe ya bo kuko iriya kipe iriho ku bwabo, badahari Rayon Sports ntiyabaho.”

Agira icyo avuga ku bakinnyi yagize ati: ” Abakinnyi ba Rayon Sports ni abanyamwuga bikomeye. Kuba mu buzima nk’ubwo babayeho i Nyanza, ntago byashoborwa na benshi. Hari ikibazo gikomeye cy’ubukene muri iyi minsi. Ndakubwiza ukuri nta n’imyenda nahabwaga ngo njye gukoresha imyitozo, ariko ntago bikabije, kandi ntago ndakariye Rayon Sports, ni ubuzima.

Ubwo twatumiraga ikipe ya Virunga yo muri Congo, nabonye umwe mu bayobozi yaka amafaranga iyi kipe ngo yo kuzabategera, bintera kwibaza byinshi, ariko binanyereka ko iyi kipe ifite ibibazo by’amikoro, ntagira gutekereza ibindi, umuyobozi yaka amafaranga yo kuzamutegera?”

Jean Francois Losciuto ni umubiligi ufite inkomoka mu gihugu cy’Ubutaliyani, yarageze mu Rwanda aje gusimbura Luc Eymael wari umaze gutandukana n’iyi kipe.

Mbere yo kuza mu Rwanda yatoje muri Togo, ubu akomereje mu gihugu cya Burkina Faso.

RuhagoYacu

UM– USEKE.RW