Jay Z na Beyoncé bakoze Concert basaba abaje gutora Clinton

Mu gihe habura iminsi ine ngo amatora abe, mu mujyi wa Cleveland muri Leta ya Ohio Hilary Clinton yasabye ibihumbi birenga 10 byari bihakoraniye kumutora. Aba bari bitabiriye concert y’ubuntu ya Jay Z n’umugore we Beyoncé waje abatunguye.

Muri iki gitaramo harimo n’abashyigikira Donald Trump bari baje kwirebera aba banyamuzika.

Beyoncé waje abatunguye yagize ati “Aya ni amateka. Hari igihe ibitekerezo by’umugore bitari bifite icyo bivuze. Nimurebe aho tuvuye tutagira ijambo kugera aho turi bugufi gukora amateka.”

Clinton ari kugerageza kwigarurira abatora muri Leta ya Ohio aho ari inyuma gato mu mahirwe hagati ye na Trump, nubwo mu zindi Leta  zimwe Clinton amuri imbere cyane. Bituma bishoboka ko yatsindwa muri Ohio ariko agatsinda amatora, byaba ari ubwa mbere bibaye kuva mu 1960.

Amasaha macye mbere y’iyi Concert, Trump nawe yariho yiyamamariza ahitwa Wilmington mu majyepfo ya Ohio nk’uko bivugwa n’ikinyamakuru US Today.

Adrienne Burroughs, 36,umwe mu baje mu gitaramo ati “Iyaba nashoboraga kongera Barack Obama indi myaka ine, nayimuha.” Gusa avuga ko nibura ubu azatora Clinton. Ati “Nibura we afite gahunda. Ariko uriya mugabo nta gahunda, nta na kimwe afite.”

Ku cyumweru, Clinton arasubira muri Cleveland aho ateganya kwiyamamaza ari kumwe na  Lebron James umukinnyi wa Basketball ukunzwe cyane muri Ohio iwabo kandi unashyigikiye Clinton.

UM– USEKE.RW