Jay Polly yashatse kwishyira hejuru, kandi Uwiteka niwe uri hejuru gusa- Bulldogg

Mu gitaramo cyarimo abantu bagera kuri 80 cyo gushyira hanze album yari ihuriweho n’indirimbo 12 za Jay Polly na Amag The Black bise ‘Ubuzima bwanjye’, Bulldogg asanga icyo gihombo cyaratewe no kwishyira hejuru kwa Jay Polly kandi ngo Uwiteka ari we uri hejuru gusa.

Uko kwishyira hejuru, ngo ni uburyo yihenuye kuri bagenzi be bari bafite amazina akomeye cyane babarizwaga muri Tuff Gangz. Noneho Jay Polly akavuga ko niyo baba badahari bitamubuza gukora igitaramo ngo cyitabirwe.

Uretse Bulldogg uvuga ko icyo gihombo cyatewe no kwihenura kwa Jay Polly, mu bari muri icyo gitaramo bavugaga ko Tuff Gangz atari izina riri aho gusa rishobora gukoreshwa uko bibonetse kose.

Ahubwo ko buri muntu wese wumvise iryo zina abonamo Bulldogg, Fireman, Green P na Jay Polly nubwo P Fla yirukanywemo mbere.

Ibyo rero bishobora gutuma nta gitaramo cya Jay Polly gishobora kuzigera cyongera kwitabirwa kubera ko ayo mazina atarimo kandi nayo afite umubare munini w’abafana bakunda ibihangano byabo.

Bulldogg yabwiye Umuseke ko atigeze ashaka kwinjira mu mitegurire y’icyo gitaramo cyane. ko yari ategereje kureba umusaruro uzakivamo nyuma.

Ati “Biriya byose byakabaye isomo ku muntu wese ushaka kwishyira hejuru kandi Uwiteka ari we uri hejuru ya byose gusa. Umuvandimwe yavuze ko nubwo twaba tudahari bitazamubuza gukorana na Tuff Gangz nshya. None koko imbaraga za Tuff Gangz nshya zaragaragaye”.

Ndayishimiye Malik Bertrand cyangwa se Bulldogg mu muziki, akomeza avuga ko nta kibi bashobora kwifuriza Jay Polly. Ahubwo ko isi ariyo yigisha umuntu uko yakitwaye.

Ku ruhande rwa Stone Church abarizwamo biherutse gutangazwa ko yasenyutse kubera kugira ibyo batumvikanagaho, avuga ko buri umwe ubu ari mu bikorwa bye bitandukanye by’umuziki.

Ariko igihe cyose bashaka gukora igitaramo cyangwa se gukorana indirimbo bitakwanga kuko n’ubusanzwe ngo atari itsinda ahubwo ari nk’ihuriro.

Joel Rutaganda

UM– USEKE.RW