Iyo Super Level itamfata 70% byari ukureka umuziki- B. Melodie

Itahiwacu Bruce ukoresha izina rya Bruce Melodie mu muziki, ni umwe mu bahanzi bazwiho ubuhanga mu miririmbire yabo. Avuga ko iyo ataza kugira amasezerano y’imikoranire na Super Level byashobokaga ko ahagarika umuziki.

Ati “Iyo ntagira amahirwe yo kujya muri Super Level byari kumviramo kureka umuziki burundu. Kuko yaje isanga maze kubura umubyeyi wanjye ariwe wamfashaga ntazi aho nakwerekeza”.

Uyu muhanzi yatangiye umuziki akora injyana ya HipHop. Rimwe aza gukora inyikirizo {Chorus} y’indirimbo ya Amag The Black. Yumvise biryoshye kurusha uko arapa arabikomeza.

Icyo gihe nibwo yavumbuye ko ashobora gukora neza injyana ya RnB kuruta uko yakomeza kuba umuraperi nubwo yumvaga ko aribyo yakora mu buhanzi bwe.

Bruce Melodie amaze gukora indirimbo zirimo Tubivemo, Indorerwamo, Telephone, yaje kugira ibyago abura umubyeyi we. Icyo gihe ngo yahise abona ko iby’ubuhanzi birangiye.

Muri icyo gihe nibwo hahise haza inzu itunganya umuziki yitirirwaga itsinda rya Urban Boys {Super Level} ariko ihagarariwe na Nsengumuremyi Richard.

Haje kubaho ibiganiro by’imikoranire na Bruce Melodie kubera ko bagombaga gushaka abandi bahanzi baza gukorera muri iyo nzu aba ariwe baheraho.

Yahise akora indirimbo zirimo {Incwi} yakoraye na Jamal wo muri Uganda, na {Hallo} nayo yakoranye na Fille wo muri Uganda. Bruce Melodie aba atangiye kwamamara atyo.

Bwa mbere yaje kugaragara mu bahanzi 10 bagombaga kwitabira irushanwa rya Primus Guma Guma Super Star muri 2013. Icyo gihe aza ku mwanya wa gatatu ryegukanwa na Riderman.

Bruce Melodie yakomeje gukora cyane anitabira n’andi marushanwa yagiye akurikira ya Guma Guma ndetse anahabwa igihembo cya Salax Awards nk’umuhanzi mwiza muri RnB.

Muri 2015 yaje gutandukana na Super Level bapfa ko yahabwaga ijanisha “Pourcentage” nto ku musaruro yinjiriza iyo studio. Baza no kujya mu nkiko.

Urubanza rwa Bruce Melodie na Richard umuyobozi wa Super Level rwaje kurangira ategetswe kwishyura miliyoni 3 muri miliyoni 40 yaregwaga.

https://www.youtube.com/watch?v=UUvJz4-nPKg

Joel Rutaganda

UM– USEKE.RW