Israel yatakaje abasirikare 13, Hamas ishimuta umusirikare wa Israel

Mu mirwano ikomeye yabaye kuri iki cyumweru hagati y’ingabo zirwanira ku butaka za Israel (IDF) na Hamas, Ikinyamakuru Mailonline cyanditse ko IDF yatakaje abasirikare 13. Ku rundi ruhande Hamas iratangaza ko yafashe bunyago umwe mu basirikare bari bayoboye urugamba ba IDF.

Ambasaderi wa Israel muri UN, Ron Prosor yamaganye aya makuru avuga ko ari ibihuha , ko nta musirikare wabo washimuswe na Hamas.

Ibitero byo mu kirere bya Israel bigera kuri 2000 bimaze kwica Abanyapalestine  barenga 300 kuva ubu bushyamirane bwatangira.

Kuri uyu wa gatanu nibwo ingabo zo ku butaka za IDF zateye Hamas mu rwego rwo gusenya imihora ica munsi y’ubutaka (Tunnels) Hamas yicukuye yinjira muri Israel.

Mu masaha 48 ashize ingabo za IDF zimaze gutakaza abasirikare 13, bamwe baguye mu bico(Ambush) byari byatezwe na Hamas.

Uru rugamba rugitangira, umusirikare wa mbere wa Israel witwa Sgt. Eitan Barak yahasize ubuzima arashwe n’abarwanyi ba Hamas. Yari muri Batallion ya 931 igize Brigade yiwa Nahal imwe muri eshanu zikomeye za IDF zirwanira ku butaka.

Muri rusange ejo hapfuye abantu 65 barimo abasirikare n’abasivili, bikaba bivugwa ko ariwo munsi waguyemo abantu benshi kurusha iyindi kuva iyi ntambara yatangira.

Minisitiri w’Intebe wa Israel yari yabanje kwanga ibi bitero avuga ko bishobora kuzahitana bamwe mu basirikare be ariko yitswa igitutu na bamwe mu bagize inteko ishinga amategeko n’abaminisitiri bituma ahitamo gutera.

ububiko.umusekehost.com