Israel yarakajwe n’uko Iran yakuriweho ibihano

Nyuma y’ibiganiro birebire hagati ya UN, USA, n’Umuryango w’ibihugu by’Uburayi na Iran bemeranyijwe ko Iran ikurirwaho ibihano by’ubukungu yari yarafatiwe ariko uyu mwanzuro warakaje Minisitiri w’intebe wa Israel, Benjamin Netanyahu wavuze ko Iran bayihaye uburenganzira bwo koreka imbaga.

Ibi biganiro byari bimaze igihe bibera Geneva mu Busuwisi muri imwe mu nzu za UN, yari itegerejweho na benshi kureba uko abayobozi bayobora Isi baza kwemeranywa ku bibazo bya Iran na gahunda bavuga ko ifite yo kwigwizaho ibisasu bya kirimbuzi.

Israel yemeje ko ubu amahanga ahaye rugari Iran ngo ikore ibisasu bya kirimbuzi bityo ko nayo(Israel) izakomeza kuryamira amajanja.

Muri aya masezerano, amahanga yemeje ko akuriyeho Iran ibihano by’ubukungu ariko nayo igaharika burundu gukora ibisasu bya kirimbuzi.

Abakurikirana imibanire y’ibihugu by’ibihangange na Iran bemeza ko ibi bikozwe mu rwego rwo korohereza Iran gucukura, gutunganya no kohereza petelori n’ibiyikomokaho mu mahanga bityo icyuho cyari gihari kikagabanyuka.

Vuba aha mu Rwanda igiciro cyibikomoka kuri Petelori giherutse kuzamukaho amafaranga 95 Rwf kuri Litiro, abahanga bakavuga ko byatewe n’uko ari nke ku Isi ndetse n’ibindi bibazo biri mu bihugu bicukura Peteroli nka Nigeria, Yemen, Arabie Saoudite, Iran, Irak, Misiri n’ahandi.

Mu magambo yumvikanamo umujinya Netanyahu yagize ati: “Ubu Iran ihawe rugari! Igiye kujya yinjiza amamiliyari y’amadolari menshi azayifasha gukomeza kugirira amahanga urugomo ndetse na Israel by’umwihariko.”

Umunyamabanga wa U.S John Kerry ushinzwe ububanyi n’amahanga  wari umaze iminsi 19 ahuza abarebwa n’iki kibazo, John Kerry, yavuze ko yishimira ibyo bagezeho, avuga ko ari ‘ibintu bishishikaje kandi bashakaga’.

Igihugu cya Syria cyashimiye Iran kubyo yagezeho kandi Syria isanzwe idacana uwaka na Israel.

Bimaze iminsi byandikwa ko Iran ariyo ifasha umutwe w’abarwanyi b’aba Houtis barwanya ubutegetsi bwa Yemen nayo ifashwa n’ibihugu by’abarabu byishyize hamwe biyobowe na Arabie Saoudite.

Ikinyamakuru Dailymail cyemeza ko aya masezerano abaye intsinzi ikomeye kuri Perezida Obama wa USA na Perezida Ruhani wa Iran umaze hafi imyaka ibiri ategeka Iran nyuma yo gusimbura Muhamoudu  Ahamadinejad.

Iran ituwe n’abaturage miliyoni 77 iri mu bihano by’ubukungu yafatiwe n’abakuru b’ibihugu bikize guhera muri 2002.

UM– USEKE.RW