Isomwa ry’urubanza rwa Evode IMENA rirasubitswe, umucamanza ngo yabuze umwanya

Isomwa ry’icyemezo cy’Urukiko rukuru ku bujurire bw’Ubushinjacyaha ku ifungwa n’ifungurwa ry’agateganyo rya Evode IMENA wahoze ari umunyamabanga wa Leta ushinzwe ubucukuzi bw’amabuye y’agaciro rimaze gusubikwa kuri uyu mugoroba.

Byari biteganyijwe ko nyuma yo kumva iburanisha ku mpande zombi mu cyumweru gishize uyu munsi Urukiko rufata umwanzuro niba Evode IMENA nawe afungwa by’agateganyo kimwe n’abagabo babiri bareganwa cyangwa akomeza gukurikiranwa ari hanze nk’uko byanzuwe n’Urukiko rw’ibanze.

Uyu munsi umucamanza yavuze ko atabonye umwanya wo gusuzuma imiburanire y’impande zombi kuko yahise yinjira mu minsi igize impera z’icyimweru isanzwe ari ikiruhuko cy’inzego za Leta. (Baheruka kuburana kuwa gatanu ushize).

Umucamanza yaje aje kubwira impande zombi ko isomwa ry’imyanzuro ryari riteganyijwe none, yavuze ko ku munsi w’ejo hashize nabwo atabonye umwanya kuko hari habaye inama y’inzego z’ubucamanza.

Ubushinjacyaha bwari buhagarariwe n’umushinjacyaha waburanye uru rubanza rw’ubujurire.

Abaregwa ntabari bitabye uretse umwe mu banyamategeko bunganira Evode IMENA wari uri mu cyumba cy’iburanisha.

Umwanzuro kuri iri buranishwa ngo uzasomwa kuwa kane tariki 16 Werurwe.

Martin NIYONKURU
UM– USEKE.RW