Isoko ry’Imari n’Imigabane ry’u Rwanda ntiryatangiye neza umwaka wa 2016

Ku munsi wa mbere w’Isoko ry’Imari n’Imigabane ry’u Rwanda “Rwanda Stock Exchange (RSE)” muri uyu mwaka mushya, kuri uyu wa kabiri tariki 5 Mutarama, 2016 nta mugabane n’umwe wacurujwe; Ndetse igiciro cy’imigabane hafi ya yose kiguma kucyo cyariho mbere y’uko umwaka ushize wa 2015 usoza.

Ku isoko, Umugabane wa BK ntiwahindutse ugereranyije n’ahashize ukaba uri ku mafaranga y’u Rwanda (Frw) 280, uwa Bralirwa nawo ntiwahindutse wagumye ku mafaranga 174, isoko ryafunze kandi umugabane wa CTL ukiri ku mafaranga 99.

Indi migabane itahindutse ni iya EQTY ihagaze ku mafrw 334, naho iya NMG iheruka gucuruzwa ku mafrw 1,200, uwa USL ku mafaranga 104, ndetse na KCB iri ku mafaranga 330.

Nubwo isoko ryatangiye rituje, ikinyamakuru Bloomberg cyatangaje ko Isoko ry’Imari n’Imigabane ry’u Rwanda ryiteze kwakira ibindi bigo bitatu bizaza gucuruza imigabane yabyo muri uyu mwaka wa 2016.

Pierre Celestin Rwabukumba, umuyobozi mukuru w’Isoko ry’Imari n’Imigabane ry’u Rwanda ariko yanze kugitangariza amazina y’ibyo bigo, ngo kubera ko bitabyifuza.

Ibi bigo bitatu nibyiyongera kuri 7 bisanzwe, Isoko ry’Imari n’Imigabane rizaba rigize ibigo 10; ndetse nk’uko bisanzwe buri gihembwe, Guverinoma ikaba izakomeza kongera ku isoko impapuro z’agaciro-mpeshwafaranga icuruza buri gihembwe. Mu kwezi gutaha kwa Gashyantare, Guverinoma izacuruza impapuro z’igihe gito.

Bloomberg ikavuga ko mu mwaka ushize wa 2015, “Rwandan Stock Exchange All Share Index », tugenekereje mu Kinyarwanda ni “Igipimo cy’agaciro n’imigabane yacurujwe ku Isoko ry’Imari n’Imigabane ry’u Rwanda” cyamanutseho 3.9%.

Muri rusange, ngo Isoko ry’Imari n’Imigabane ry’u Rwanda rifite agaciro k’amafaranga y’u Rwanda Tiriyari 2.82 (ajya kungana n’amadolari ya Amerika Miliyari 3.75).

UM– USEKE.RW