Isaac Iranzi akeneye ubufasha bwawe kugira ngo abone itike yamujyana kuvuzwa mu Buhinde

Updated 11/01/2016:  Iyi nkuru yatangajwe hagati mu kwezi k’Ukuboza 2015, Iranzi n’ubu ntarabona ubufasha buhagije bwatuma akorerwa operation ya kabiri ngo akire neza. Icyo yabuze ni amafaranga yo kumusubiza mu Buhinde.

Ndahiro Isaac Iranzi ni umwana w’umuhungu w’imyaka itatu n’amezi ane, yavukanye indwara idasanzwe yitwa Extroph of cloaca. Ibitaro byo mu Rwanda byabonye ntacyo byayikoraho, yahawe Transfer yo kujya mu Buhinde ku nshuro ya mbere, ubu akaba akeneye gusubirayo ku nshuro ya kabiri kugira ngo umuryango we wizere ejo hazaza he.

Extroph of cloaca ni indwara idasanzwe umwana avukana, iyi ndwara itera agahinda ababyeyi b’umwana uvukana ibice bimwe byo munda biri hanze, nk’uko uyu Ndahiro Isaac Iranzi yavutse ameze. Iranzi yavutse amara n’impyiko biri hanze, ndetse n’imyanya myibarukiro ye imanyuye mo ibipande bibiri.

Kubera uburemere bw’uburwayi bw’uyu mwana, n’ubushobozi bucye bw’ababyeyibe, ubuvuzi bwose azakorerwa Minisiteri y’ubuzima (MINISANTE) yarabwishingiye, ariko ababyeyi be bakaba bagomba kwirwanaho ku bindi.

Minisiteri y’ubuzima yemeye kwishyura ubuvuzi bwose uyu mwana azakenera mu bitaro byo mu Buhinde ariko ababyeyi nabo ngo bagashaka amikoro yo kugerayo, ndetse no kwitunga.

Ku nshuro ya mbere ajya mu Buhinde, yahawe inkunga ya Tike y’indege n’uwari Nyampinga w’u Rwanda Mutesi Aurore; Naho kubaho byo ingo icyo gihe yari atunzwe n’imfashanyo z’abantu batandukanye bamugiriraga impuhwe.

Mbabazi Liliane nyina w’uyu mwana aganira n’UM– USEKE yawutangarije ko yari yahawe gahunda yo gusubira mu Buhinde kongera kumubagisha “operation” nyuma y’umwaka. Ariko ngo umwaka umaze kurengaho amezi atanu (5) kubera kubura amikoro.

By’umwihariko, Mbabazi ashimira Minisiteri y’Ubuzima, Nyampinga Mutesi  Aurore n’abandi bantu bose bamufashije ku nshuro ya mbere; Kandi ngo afite ikizere cyuko Imana izakomeza gufasha umwana we agakira.

Ati “Umwana wange batangiye kumuha garanti (igihe cyo kubaho) ataranavuka, avutse bakamuha iy’amasaha, iy’iminsi ngo namara iki cyumweru kiriya ntazakimara, ariko Imana yakomeje kumurinda.”

Uyu mubyeyi avuga ko abaganga bamubwiye ko umwana atwite afite ikibazo inda imaze kugira amezi 7, bamusabye ko yayikuramo arabyanga kuko yumvaga atakwica umwana umaze amezi 7 amukinira mu nda amanywa n’ijoro, ikindi kandi ngo yumvaga yaba ashyize ku biganza bye icyaha cyo kwica yazahora yicuza nk’umuntu wizera Imana.

Ati “Bambwiye kuyikuramo ndavuga ngo Mana singiye gukora iki cyaha. Basi Mana kuba inda ntacyo intwaye reka nzamubyare basi niwashaka kumwisubiza uzahite umwisubiza maze kumubyara.”

Mbabazi avuga ko kubaga umwana we ku nshuro ya mbere byamugiriye umumaro kuko za nyama zari hanze bazisubije mu nda bakamudoda, bakamushyiraho agahombo anyariramo n’ako yitumiramo, ku buryo ubu ngo Iranzi Isaac asigaye akambakamba, ndetse agahagurukira ku kintu ku buryo mu minsi iri imbere ashobora kugenda. Ariko ngo hakenewe ko yongera kubagwa yo gukosora amagufa yo mu maguru, imyanya myibaruiro, n’amara n’urwungano.

Umubyeyi Mbabazi ubanza ku kwihanganisha mbere yo ku kwereka amafoto ya Iranzi kuko abantu benshi batabasha kuyareba, avuga ko abaganga bajya bamubwira ko umwana we azaba umuhanga cyane, dore ko n’ibizamini byakozwe byasanze mu mutwe we nta kibazo hafite.

Mbabazi ngo yahamagawe n’ibitaro byitwa “Nayahana Health Hospital”mu Buhinde kugira ngo azane umwana bongere bamubage hakiri kare, gusa yabuze amikoro. Ngo biramusaba Amadorari ya Amerika ($) 4 000; Kugeza ubu, Mbabazi n’umugabo we bakaba bafite n’atageze ku 1000 $, kuko bafite amafaranga y’u Rwanda 300.000 gusa.

Ufite umutima wo kumufasha wahamagara kuri nomero za Telefone zigendanwa: 0783790535/0784315300; cyangwa ugakoresha Konti yo muri Banki y’Abaturage y’u Rwanda nomero 401-2025348-11.

Mutubabarire ntabwo twashyiraho amafoto agaragaza uburwayi bwa Iranzi Isaac kuko buteye ubwoba, icyakora ukeneye kuyareba yatoherereza E-mail ye kuri [email protected].

Callixte Nduwayo
UM– USEKE.RW