Iranzi, Ombolenga na Kalisa birukanywe muri Slovakia kubera imyitwarire mibi

Ikipe ya MFK Topvar Topoľčany yo mu kiciro cya gatatu muri Slovakia yatangaje ku mugaragaro ko yirukanye abakinnyi batatu b’abanyarwanda Iranzi Jean Claude, Ombokenga Fitina na Kalisa Rachid. Barashinjwa imyitwarire mibi no kutubaha ubuyobozi bw’ikipe.

Mu mpeshyi y’umwaka ushize nibwo inkuru yamenyekanye umuyobozi wa MFK Topvar Topoľčany yaje mu Rwanda akumvikana n’amakipe arimo APR FC, basinyana amasezerano yo kuyitiza abakinnyi babiri imyaka itatu; Iranzi Jean Claude na Ombolenga Fitina wari muri Kiyovu sports na Kalisa Rachid wari urangije amasezerano muri APR FC.

Aba basore bamaze umwaka w’imikino bakina muri Slovakia ubu bari mu Rwanda kuko bari bahamagawe n’ikipe y’igihugu Amavubi yatsindiwe muri Central African Republic mu gushaka itike y’igikombe cya Afurika 2019.

Inkuru itunguranye ni uko aba abakinnyi b’Amavubi birukanywe na MFK Topvar Topoľčany bakanamburwa uburenganzira bwo gukorera i Burayi nkuko byatangajwe n’umuyobozi w’iyi kipe Abdelaziz Benaoudia.

Uyu muyobozi yagize ati: “Nyuma y’inama y’ubuyobozi twakoze twemeje gutandukana n’abakinnyi batatu b’abanyarwanda, ndetse twanatesheje agaciro ibyangombwa bari bafite bibemerera kuba i Burayi guhera uyu munsi. Impamvu yatumye dutandukana ni imyitwarire mibi bo n’ushinzwe kubashakira ubuzima (agent) bagaragaje”

Bivugwa ko ubuyobozi bwa MFK Topvar Topoľčany butishimiye kuba Ombolenga Fitina na Kalisa Rachid baragiye gukora igeragezwa mu ikipe zo muri Espagne nta ruhushya basabye.

Roben NGABO
UM– USEKE.RW