IPRC Kigali yahize kwegukana Playoffs ngo iseruke muri Afurika
Abasore ba IPRC ya Kigali barimo Jean Philipe Kubana Tubane ufite umupira ngo bagowe n’imikino ya shampiyona kubera amasomo
Imikino ya shampiyona y’u Rwanda ya Basketball yarasojwe intsinzi itaha mu ikipe nshya ya REG. Gusa umwaka w’imikino nturarangira kuko hasigaye Playoffs zizatangira muri Nyakanga. Buhake Albert utoza IPRC ya Kigali yahize kwegukana irushanwa risigaye ngo azahagararire u Rwanda mu marushanwa mpuzamahanga.
Kuva tariki 3 Nyakanga ku bibuga bitandukanye birimo Petit stade i Remera hazatangira imikino ihuza amakipe ane yabaye aya mbere muri shampiyona y’u Rwanda.
Muri Playoffs z’uyu mwaka; REG Basketball Club yegukanye igikombe cya shampiyona izacakirana na Espoir BBC yabaye iya gatatu. Aya makipe yombi yahuye ku mikino ibiri ya nyuma y’amarushanwa yo kwibuka abazize Jenoside yakorewe abatutsi 1994. Mu irushanwa ry’imbere mu gihugu Espoir BBC yatahanye intsinzi, naho REG itsinda mu irushanwa mpuzamahanga.
Undi mukino wa Playoffs uzahuza Patriots BBC yabaye iya kabiri na IPRC Kigali yabaye iya kane muri shampiyona y’u Rwanda.
Buhake Albert utoza IPRC ya Kigali yabwiye Umuseke ko umwanya babonye muri shampiyona atariwo bari bakwiye, agira ati:
“Twagize imbogamizi nyinshi muri uyu mwaka w’imikino. Gutoza ikipe igomba guhangana n’abeza bose mu gihugu kandi ari ikipe y’abanyeshuri biragora cyane. Hari imikino myinshi twatakaje muri shampiyona kuko hari abakinnyi bacu batabonetse kubera impamvu z’amasomo. Hari n’imikino tutitwaye neza kuko ikipe yose yabaga iri mu bizami. Ubushobozi n’impano dufite ntitwari dukwiye uyu mwanya muri shampiyona ariko ntacyo twashoboye kugera muri ane ya mbere”
Uyu mutoza yakomeje avuga ko bafite intego yo kwegukana irushanwa rya Playoffs kuko ritazabagora nkuko byagezenze muri shampiyona.
“Ubu abakinnyi banjye bose bari mu biruhuko. Umutima, ibitekerezo n’imbaraga zabo bazishyize kuri Basketball 100%. Mfite ikizere ko tuzegukana Playoffs kuko byadufasha kugera ku ntego zacu zo guhagarira u Rwanda mu marushanwa ya Afurika duhereye kuri Zone 5 z’umwaka utaha.”
Iyi kipe ikomeje imyitozo izakina umukino wa mbere na Patriots BBC tariki 3 Nyakanga 2017.
Photo: Evode Mugunga/UM– USEKE
MuRoben NGABO
UM– USEKE
English