Inzira yo kwibohora iracyari ndende, ntaho twari twagera-Kagame

Mu ijambo Perezida wa Repubulika Paul Kagame yagejeje ku banyarwanda mu muhango wo kwizihiza isabukuru y’imyaka 20 u Rwanda rwibohoye wabereye kuri Stade Amahoro kuri uyu wa gatanu tariki 04 Nyakanaga, yashimiye buri munyarwanda n’abanyamahanga bose bemeye kwitanga kugira ngo u Rwanda rubohorwe, gusa yibutsa ko inzira ikiri ndende ku Banyarwanda n’Abanyafurika muri rusange ngo bibohore byuzuye.

Iri jambo ryaje risa n’irisoza ibirori n’akarasisi ka Gisirikare, ryibanze ahanini ku gukangurira abanyafurika n’Abanyarwanda muri rusange guhaguruka bagafatana urunana bagaharanira kwibohora bya nyabyo.

Perezida Kagame yavuze ko uyu munsi Abanyarwanda bose bahagaze bememye nk’abantu bafatanyije, bibohoye kandi bafite icyerekezo kimwe kiganisha aho bifuza kugeramu buryo butigeze bubaho mu mateka y’u Rwanda.

Yagize ati”Tariki 04 Nyakanga 1994,igice kibi cy’amateka yacu nibwo cyasojwe, ubuzima bushya butangirira aho. Kwibuhora byasabye ibitambo by’abantu batandukanye, guhera kubagiye ku rugamba abenshi ntibagarutse, kubitanze n’ababishyigikiye mu buryo n’ubushobozi bwose bari bafite, uyu munsi bose turabibuka tubaha icyubahiro bakwiye.”

Kagame yabwiye imbaga y’abantu bari buzuye muri Stade Amahoro ko intego Abanyarwanda bihaye yo kurwanya ivangura batazigera bayitezukaho kuko aribyo bibaha kubaka igihugu gishya bahuriyeho bose, igihugu kibaha umutekano, Serivisi n’amahirwe yo kwiteza imbere bingana.

Gusigasira umutekano n’ibyagezweho

Kagame yavuze ko mu rugamba rwo kwibohora buri muryango w’Abanyarwanda wabuze byinshi, ari nayo mpamvu badashobora gutezuka ku kurinda ibyo bamaze kugeraho.

Kubwe asanga ibyo Abanyarwanda bamaze kugeraho bishingiye no kubyo batakaje, ariko na none uyu munsi wo kwibohora ngo ni uwo kongera gufata inzira yo gukora ibyo bagomba kugira ngo bubake igihe kiri imbere kibabereye.

Avuga kandi ko ubu inzego z’umutekano z’u Rwanda zikora ibishoboka byose ngo zirinde igihugu ku bufatanye n’abaturage.

Ati”Urugamba rwacu rwatwigije ko icyizere cy’abaturage ariwo musingi wo kubaka igihugu. Turabashimira bose ku bwitange bwuje gukunda igihugu.”

Perezida Kagame kandi yibukije Abanyarwanda n’incuti z’u Rwanda ko batagomba kwirara kuko kwibohora atari igikorwa cy’umunsi umwe gikorwa ngo gisozwe uwo munsi, ahubwo ari imyumvire ituma ibyo bakora babikora neza, kandi ikabaha imbaraga zo guhangana n’ibindi bibazo bivuka kandi bakabibonera ibisubizo.

Ati”Hari igihe kwibohora bisaba ibikorwa bya gisirikare ariko ntabwo aribyo bibirangiza, aho niho u Rwanda ruri uyu munsi mu rugamba rutangira nyuma yo guceceka kw’imbunda.”

Kwibohora kw’Afurika

Mu ijambo rye Perezida Kagame yaboneyeho n’umwanya wo gusa n’utanga ubutumwa ku banyafurika bose ko mu gutangira urugamba rwo kubohora iki gihugu baharaniraga u Rwanda rwiza, bityo n’abanyafurika bikwiye kubabera isomo bagaranira afurika nzizabifuza, gusa ngo biragoye mu gihe badafite ubumwe.

Perezida yavuze ko ibyo u Rwanda rwanyuzemo byaba ibihe bibi no kongera kuvuka kw’igihugu ari kimwe mu bigize amateka ya Afurika.

Ati”Intambara zo kwibohora zabaye mu bindi bice by’Afurika twabibonyemo amasomo n’ibibazo bisa n’ibyacu, abakurambere barwaniye ubwigenge bari bafite uburakari bufite ishingiro bitewe n’ubukoloni, ivangurabwoko n’ibindi bikorwa by’akarengane uko byaba bimeze kose, natwe byari uko.”

Kandi ngo ibyo abakurambere barwaniraga amahoro baharaniraga baba barabigezeho cyangwa batarabigezeho, icy’ingenzi ari uko bari bafite ishyaka n’umuravamu gushyira mu bikorwa ibyo bemeraga n’ubwo habaye ingaruka nyinshi.

Ati”Turacyafite urugendo rurerure rwo kugenda ariko u Rwanda rwabashije kugera aho rugeze ubu kuko ibibazo dufite twabashije kubigira ibyacu kandi tugafata iya mbere mu guhangana nabyo. Dukomeje uyu murongo nta mpamvu zo gutinya ejo hazaza hacu.”

Muri uko guharanira kwibohora nyako, Perezida Kagame yasabye Abanyafurika kwirengagiza iby’abashaka kubatanya ngo babone uko babayobora ahubwo bagafata mu nshingano ejo hazaza habo kuko ngo ubu urugamba rwo kubohora Afurika ari urwo mu myumvire n’ibitekerezo gusa.

Ikindi kandi yasabye Abanyafurika kutemera ibibatesha agaciro no kwihunza inshingano zabo kuko byanze bikunze ingaruka aribo zigeraho.

Ati”Kugira ngo tujye mbere dushobora guhitamo kwiyizera, gukora neza by’intangarugero no gufata mu ntoki ibyacu, ibyo nibyo byonyine byaduha ibisubizo dushaka, nta kintu cy’ahahise gikwiye gusobanura gutsindwa kwacu.”

Yagize n’icyo asaba urubyiruko

Aha Perezida Kagame yavuze ko urugamba rutari rugamije gukingira abana b’u Rwanda ingaruka z’intambara maze ngo bibwire ko amahoro adaharanirwa.

Ati”Nabo bagomba gufata iya mbere bakamenya inshingano zabo, icyo tuzakora ni ukubaha ibyangombwa bibategura.”

Avuga kandi ko urubyiruko rw’Abanyafurika n’Abanyarwanda ahura nabo, abona nta kintu babuze,kuburyo ngo bashobora kuzamura Afurika bakayigeza ku kugire Abanyafurika bose bifuza haramutse habayeho gufatana urunana mu kubiharanira.

Perezida Kagame kandi yavuze ko Kwibohora byamye ari ubukangurambaga bwo guharanira agaciro k’ikiremwamuntu, ubutabera, ukuri n’impamvu zumvikana n’ubundi ngo ibyo niba Abanyafurika babikeneye urugamba ni urwabo ngo barurangize kandi ko iki aricyo gihe cyo kubikora.

Ati”Banyarwanda, bany’Afurika y’Iburasirazuba, Abanyafurika muri rusange dufite akazi kenshi ko gukora, dufite ubushobozi bwo kubikora mureke tujye mbere.”

Uyu muhango witabiriwen’abantu batandukanye barimo Perezida Kaguta Museveni wa Uganda, Uhuru Kenyatta wa Kenya, Salva Kiir Mayardit wa Sudani y’Epfo, Visi-Perezida wa Mbere w’Uburundi Prosper Ntibazonkiza, Mama Maria Nyerere, umugore wa Nyakwigendera wahoze ari Perezida wa Tanzaniya Julius Nyerere wanashimiwe ku ruhare umugabo weyagize mu rugamba rwo kubohora u Rwanda n’abandi batandukanye.

Yaba ubutumwa bwanditse Perezida Salva Kiir yagejeje ku Banyarwanda, n’ubwo Perezida wa Kenya Uhuru Kenyatta yavugiye kuri Stade, bose bagarutse ku gushimira ibyo abanyarwanda bamaze kugeraho n’aho bikuye ndetse banasezeranya u Rwanda ko bari kumwe narwo muri gahunda zose ziri imbere.