Ingirakamaro: Yashinze ishuri ry’incuke zabyawe n’imfubyi za Jenoside…Ubu n’abandi baraza

*Ati “Ushobora kubabara ariko wagira ikizere mu mutima ukabaho neza”

Albert Musabyimana ukunze kumvikana mu magambo y’ihumure, yarokotse Jenoside yakorewe Abatutsi, avuga ko yakuze arera barumuna be yari amaze gusigirwa n’ababyeyi be. Nyuma yashinze ishuri ryigisha abana b’incuke bavutse ku babyeyi basizwe ari imfubyi za Jenoside babyaye batewe inda zitateguwe, gusa nyuma yaje kwagura iri shuri ubu rinakira abandi bana baryegereye cyane cyane abava mu miryango itishoboye.

Musabyimana yarokotse jenoside afite imyaka 16, avuga ko yakuriye mu buzima bukomeye arwana kuri barumuna be babiri basizwe n’ababyeyi be bishwe muri Jenoside.

Yatsinze ikizamini cya Leta gisoza amashuri abanza, ajya kwiga mashuri yisumbuye arihirwa na Leta, nyuma akomereza amashuri ye mu cyahoze ari KIST, aho yarangirije amasomo y’ikiciro cya kabiri cya kaminuza.

Uyu mugabo uvuga ko we na barumuna be bagendaga baba mu miryango, ko mu 2005 aribwo bubakiwe inzu yo kubamo mu mudugudu wa Kinyinya watujwemo abacitse ku icumu batishoboye biganjemo abana b’imfubyi bireraga n’incike za jenoside.

Albert wari umaze gukura kandi ari  muri kaminuza, we na bagenzi be bari bamaze gutuzwa aha basabye ko bakubakirwa inzu mberabyombi kugira ngo bajye babona aho bakirira ababasuye.

Iki kifuzo cyaje kumvikana ndetse gishyirwa no mu bikorwa. Avuga ko icyamushimishije ari uko iyi nzu mberabyombi yaje gutahwa na perezida wa Repubulika y’u Rwanda, Paul Kagame.

Kubera gukunda kwita ku bana yane abababaye nka we, yatekereje uko yajya ahuriza hamwe abana b’incuke bavutse ku bakobwa b’imfubyi babaga muri uyu mudugudu batewe inda zitateguwe, bakaza kwigira muri iyi nzu mberabyombi bari bamaze kubakirwa.

Avuga ko ababyeyi b’aba bana batari bafite ubushobozi bwo kubajyana mu mashuri kandi we azi ko nta n’undi murage bazaha aba bana babo utari uburezi.

Mu 2012, Musabyimana yaguye ibikorwa bye akajya yigisha abana bose bavuka mu miryango itishoboye, ari na ho havuye igitekerezo cyo gushinga umuryango yise Peace and Hope Initiative (Amahoro n’Icyizere) ufasha abana bakomoka mu miryango itishoboye.

Iri shuri rye ryari rimaze kwagukamo umuryango wa ‘Peace and Hope initiative’ ati “Natangiye mfasha abana b’incuke 48, ubu maze kugeza ku bana 140 biga kuva muri Maternel ya mbere kugeza mu ya gatatu, kandi ubu twatangije n’umwaka wa mbere w’amashuri abanza.”

Nta kindi yakwitura Leta atari ukuifasha kwita ku batishoboye…

Uyu mugabo avuga iki gitekerezo cye cyaturutse ku mibereho mibi yakuriyemo, ariko Leta yamurihiriye amashuri bikamuviramo kwita ku bavandimwe be bityo nawe nta yindi nyiturano yaha Leta uretse kuyifasha kuzamura imibereho y’abana b’u Rwanda bo mu miryango itishoboye.

Agaruka ku mibereho mibi yari yugarije abana bavukaga mu miryango ikennye muri aka gace. Ati “ Narebaga abaturanyi banjye nkabona abana babo batajya ku ishuri, birirwa bavomera abandi, bakora imirimo ivunanye ntekereza ikintu nshobora kwitura leta y’u Rwanda yamfashije kwiga ikampa n’aho kuba nsanga nta kindi nkwiye gukora uretse gutekereza  gufasha abana  kugera kubuzima bwiza.“

Peace and Hope Initiative ngo yawushinze kugira ngo agire umubare w’abana afasha kutaba mu buzima bubi nk’ubwo yanyuzemo. Ngo arifuza ko umwaka utaha uzarangira ishuri rye rifite abana 400.

Ati  “ Turifuza kongera ibyumba by’amashuri bijyanye n’igihe ku buryo umwana azajya yigira hano tukamukurikirana kugera arangije amashuri abanza kuko hari  abo twafashaga kujya kwiga ku bindi bigo twazajya ku musura tugasanga yavuye mu ishuri.”

Musabyimana watangiye yigisha ari wenyine, ubu akoresha abakozi bane bigisha aba bana mu masomo yabo ya buri munsi.

Mary Uwamahoro ufite abana babiri biga muri peace and hope initiative, avuga ko uyu muryango waje ari igisubizo kuko wabarwanyeho nk’abantu batari bafite amikoro ubu abana babo bakaba biga nta nkomyi kandi bakahavoma uburezi bufite ireme.

Peace and hope mu bindi bikorwa by’urukundo…

Uyu muryango Peace and Hope Initiative washinzwe ku gitekerezo cya Musabyimana wanubakiye inzu abakecuru b’incike batujwe muri uyu mudugugu. Iyi nzu yubakiye aba bakecuru ibafasha kubona bimwe mu byo bakeneye kuko ari bo bishyurwa amafaranga y’ubukode bwayo.

Peace and Hope Initiative kandi yanegereje abakecuru b’incike amazi kuko batabashaga kujya kuyavoma kure kubera izabukuru.

Mu magambo yuje ihumure ku bantu banyunze mu nzira y’inzitane n’abandi bugarijwe n’imibereho mibi, Musabyimana avuga ko umuntu ashobora kubabara cyane ndetse akaba yanakwiganyira yibaza icyatumye aremwa ariko ko burya isezerano ry’Imana ridahera.

Asaba abemera Imana gusoma umurongo wo muri bibiliya w’Abaromani 5 ndetse ko na we ari ho yakuye izina ry’umuryango we ‘Peace and Hope’.

Josiane UWANYIRIGIRA
UM– USEKE.RW