“Indirimbo imwe nziza yahindura ubuzima bwawe muri muzika”- Jules Sentore

Rwamwiza Bonheur uzwi cyane muri muzika nka Jules Sentore wanatowe mu 10 bazahatanira irushanwa rya Primus Guma Guma Super Star IV ku nshuro ye ya mbere, aratangaza ko indirimbo imwe nziza ishobora guhindura inzozi zawe muri muzika.

Ibi abitangaje nyuma y’aho mu mwaka wa 2012 yashyize hanze indirimbo yise ‘Udatsikira’ ari na yo yatumye amenyekana cyane kandi benshi bahamya ko ariyo imujyanye mu irushanwa ry’abahanzi 10 bakunzwe cyane mu Rwanda.

Mu kiganiro na UM– USEKE, Jules Sentore yatangaje ko ari ibyishimo kuba yaragaragaye mu bahanzi 10 bazitabira irushanwa rya PGGSSIV, ariko akaba abikesha indirimbo ye ‘Udatsikira’.

Mu magambo make yagize ati “Udatsikira’ ni imwe mu ndirimbo imaze hafi imyaka ibiri ikunzwe, bityo rero ndahamya ko byampaye isomo ryo kujya mbanza nkandika neza indirimbo yanjye mbere y’uko ijya hanze kandi nkabanza kumva ko ifite icyo ifasha Abanyarwanda”.

Yakomeje atangaza ko n’ubwo yitabiriye iri rushanwa ku nshuro ya mbere azagerageza gushimisha abakunzi be ndetse n’abakunzi ba muzika muri rusage kubera urukundo bamweretse.

Kuri uyu wa gatandatu tariki ya 22 Werurwe 2014 ni bwo igitaramo cya mbere kibimburira ibindi bitaramo by’iri rushanwa kizaba, bikaba biteganyijwe ko bizahera i Rusizi mu Ntara y’Iburengerazuba.

Joel Rutaganda
ububiko.umusekehost.com