Indi Kompanyi ya USA yahawe isoko ryo kubyaza Gaz Methane 50MW

Mu ijoro ryakeye hasinywe amasezerano hagati ya Leta y’u Rwanda ihagarariwe na Minisiter y’ibikorwa remezo na Kompanyi y’Abanyamerika ya Symbion Power yo kubyaza Gaz Methane yo mu kiyaga cya Kivu Megawatts 50 z’amashanyarazi bazajya bagurisha ikigo cya REG ku giciro gito. Ni muri gahunda yo kongera amashanyarazi mu gihugu no kugabanya igiciro cyayo.

Ubusanzwe Leta y’u Rwanda itanga miliyari 30 z’amanyarwanda mu gufasha abaturage kwishyura ikiguzi cy’amashanyarazi buri mwaka.
Aya masezerano y’imyaka 25 yasinywe ngo azagabanya iki giciro Leta yatangaga ifasha abanyarwanda kubona amashanyarazi.

Symbion Power y’abanyamerika yiyongereye kuri Kompanyi ya ContourGlobal y’abanyamerika nayo isanganywe iri soko ry’umushinga wa KivuWatt aho ikiciro cya mbere cy’uyu mushinga wa KivuWatt kigomba gutanga 26MW naho ikiciro cya kabiri kigatanga 75MW.

James Musoni Minisitiri w’ibikorwa remezo yavuze ko iyi sosiyete ngo izajya igurisha amashanyarazi yavanye muri Gaz Methane ku giciro gito kitigeze kigurwaho amashanyatazi mu Rwanda bikazafasha kugabanya igiciro umunyarwanda yishyuraga amashanyarazi.

Musoni avuga ko ibura ry’amashanyarazi rya hato na hato ritazajya ribaho kubera ihindagurika ry’ikirere nk’uko bigenda ku mashanyarazi atangwa n’amazi cyangwa ava ku mirasire y’izuba.

Minisitiri Musoni ati “Megawatts 50 bazaduha ziziyongera kuri 161MW dusanganywe mu Rwanda. Ni intambwe izaba ishimishije igana ku ntego twihaye yo kugeza kuri Megawat 563 mu mwaka wa 2018.”

Paul Hinks umuyobozi wa Symbion Power yavuze ko bafite ubushobozi n’ubushake bwo gufasha abanyarwanda kubona amashanyarazi kandi ko mu mezi 15 bagitangira bazahita batanga 14MW kandi bakoresheje amafaranga yabo badategereje ayo bazahabwa na Banki.

Hinks yavuze Megawatt 50 bazitanga zose mu gihe cy’amezi 36.

U Rwanda rusanzwe rukoresha 161MW gusa, izi zigera ku baturage bangana na 24% by’abanyarwanda bakora imirimo itandukanye. Mu 2018 intego ngo ni uko umuriro uzaba ufite abaturarwanda 70%.

Kuri iyi ntego bigaragara ko ari nini ugereranyije n’igihe gisigaye, ndetse bamwe bagiye bavuga ko ari ukwigerezaho, Minisitiri James Musoni avuga ko nta kabuza bizagerwaho.

Ati “Ntimukangwe n’uko tukiri kuri 24% kuko mu 2008 twari ku 8% gusa, twikubye inshuro enye mu myaka irindwi. Birashoboka cyane rero ko tuzikuba gatatu mu myaka itatu isigaye kuko dufite abafatanyibikorwa bafite ubushake kandi na Leta y’u Rwanda iki kibazo yakigize ikihutirwa.”

Photos/C.Nduwayo/Umuseke
Callixte NDUWAYO
UM– USEKE.RW