Imyitozo y’Amavubi yatumye Danny na Rusheshangoga badatangira akazi muri Singida United

Abakinnyi babiri b’abanyarwanda Danny Usengimana wa Police FC na Michel Rusheshangoga wa APR FC bamaze kumvikana na Sigida United. Iyi kipe yasabye ko bajya muri Tanzania gusinya no gutangira imyitozo muri iki cyumweru ariko ntibyakunda kuko bari mu mwiherero w’Amavubi.

Kuri uyu wa mbere tariki 29 Gicurasi 2017  nibwo ikipe yazamutse mu kiciro cya mbere muri Tanzania, Singida United yatangiye imyitozo mu mujyi wa  Dar es Salaam.

Iyi kipe yamaze kumvikana n’abakinnyi babiri b’abanyarwanda Danny Usengimana rutahizamu wa Police FC umaze gutsinda ibitego 18 muri shampiyona y’u Rwanda, na Michel Rusheshangoga kapiteni wungirije wa APR FC.

Aba basore b’abanyarwanda byari biteganyijwe ko bajya muri Tanzania kuri uyu wa mbere gusinya no gutangira imyitozo mu ikipe nshya, ariko nkuko Umuseke wabitangarijwe na Danny Usengimana, ntibyashobotse kuko bari mu ikipe y’igihugu Amavubi yitegura umukino wa Centre Afrique mu gushaka itike y’igikombe cya Afurika 2019.

Danny Usengimana yabwiye Umuseke ati: “Ibiganiro byagenze neza. Ku bushake bw’abayobozi, mperutse i Dar es Salaam gutembera no kureba ubuzima bwo muri uwo mujyi. Igisigaye ni uko baza mu Rwanda bakarangizanya na Police FC nakiniraga gusa bizarangira vuba kuko nyuma y’imikino y’ikipe y’igihugu tuzahita tujyayo.”

Iyi kipe ya Singida yatangiye imyitozo iyobowe n’umutoza mushya Hans Van Pluijm Umu-Holland watozaga Yanga Africans. Baritegura irushanwa ryateguwe n’ikigo cyo muri Kenya ‘SportPesa championship’ ryatumiwemo ibihangange by’aka karere nka; Tusker FC, AFC Leopards, Nakuru all stars zo muri Kenya na Yanga SC Simba SC na Singida United zo muri Tanzania.

Roben NGABO

UM– USEKE