“Imyiteguro ya ‘Explosion Concert’ igeze kure”- Alex Muyoboke

Muyoboke Alex  ni umwe mu bantu bazwi cyane mu bikorwa byo gufasha abahanzi gutera imbere no kubyaza umusaruro muzika bakora. Ku nshuro ye ya mbere agiye guhuriza abahanzi bose yagiye abera umujyanama “Manager” mu gitaramo kimwe yise ‘Explosion Concert’, ngo imyiteguro igeze kure.

Icyo gitaramo biteganyijwe ko kizaba ku itariki ya 18 Ukwakira 2014 muri Serena Hotel, kugeza ubu nta mpinduka n’imwe iraba mu mitegurire yacyo. Ahubwo ngo imyiteguro niyo myinshi ku bahanzi.

Nk’uko Alex Muyoboke abitangaza, aravuga ko imitegurire y’icyo gitaramo isa naho yamaze no kurangira ahubwo hategerejwe itariki nyayo.

Yagize ati “Kugeza ubu ibintu byose bisa naho bimaze kujya ku murongo kuko nta mbogamizi turahura nazo zatuma icyo gitaramo kitaba. Akazi gasigaranye abahanzi bo bari mu mitegurire y’amajwi yabo gusa n’ubwo bose bazi icyo gukora”.

Icyo gitaramo kizahuza abahanzi bo mu Rwanda barimo Tom Close, Dream Boys, Urban Boy, Social Mula, Davis D, Nina & Charly. Hakazaba ahari na Big Farious ndetse na Jackie Chandiru.

Kikazabera muri Serena Hotel aho kwinjira bizaba ari 5000frw mu myanya isanzwe na 10.000frw y’u Rwanda mu myanya y’icyubahiro ‘VIP’.

Joel Rutaganda

UM– USEKE.RW