Imyanda yatumaga Nyabugogo huzura yabaye myinshi kubera uburangare

Imyanda yigihe kinini yari yarirunze mu mateme no mu mugezi wa Nyabugogo niyo yatumaga aha hantu huzura cyane, bitewe n’imvura imaze iminsi igwa muri Kigali, ikaba yaragiye iba myinshi kugeza aho iteza ikibazo kubera uburangare.

Abaturage n’ingabo bakaba kuva muri iyi week end barahagurukiye kumaramo iyi myanda ku buryo bigaragara ko iki kibazo cy’amazi yarengaga akagera mu mihanda gishobora kudasubira.

Mu gitondo cy’uyu wambere bamwe mu baturage nyuma yo kwemererwa insimbura mubyizi,  bakaba biriranwe n’abasirikari mu muganda wo gusibura umuyobora wa Nyabugogo. Umwe muri abo baturage akaba yatubwiye ko bemerewe guhabwa insimburamubyizi ingana na frw 3000 buri umwe.

Ikibazo cy’isuku ndetse n’imyanda ibuza amazi guhita, ukurikije ubuhamya bw’abaturage n’abandi twavuganye, burerekana ko inzego zigishinzwe cyane iz’ubuyobozi bw’umujyi wa Kigali zitagikurikiranye uko bikwiye mu myaka ishize, kugeza ubwo kigeze aho giteza imyuzure.

Hategekimana Emmanuel umukozi muri minisiteri y’Ibikorwaremezo mu ishami rishinzwe ingufu, amazi no gusukura,  wari mu muganda, yadutangarijeko ikibazo cya Nyabugogo kitarigikwiye guhuruza Minisitiri w’Intebe,  ku bwe ngo hakagombye kubaho uruhare rw’inzego z’ibanze mu kurangiza ikibazo cya Nyabugogo.

“ Ibi birigukorwa ni uburyo bw’ibanze bwo gukemura iki kibazo, hari inyigo izakorwa ku girango ikibazo gikemuke burundu.”

Ku bwa Rugumaho Celestin umuturage uturiye Nyabugogo avugako nabo babangamiwe n’amazi n’imyanda biva muri Nyabugogo, ariko agashinja Ubuyobozi ko bwarangaye ngo kuko mbere igishanga gikikije Nyabugogo ubwo cyahingwagamo, byatumaga imiyoboro y’amazi isiburwa.

Ku bwe, ngo imyanda ituruka hirya no hino muri za ruhurura ndetse no muri gereza nkuru ya Kigali (1930), bigira uruhare mu kuzuza Nyabugogo ngo ariko bikitirirwa abahaturiye.

Rugumaho akaba asaba ko Nyabugogo yahabwa ibimoteri byimurwa (Pipes) ku buryo abacuruzi baho bajya bashyiramo imyanda ikajyanwa ahandi itajugumwe mu mugezi.

Lieutenant Colonel Happy Ruvusha uyobora Bataillon ya 9 ari nayo ikora umuganda wo kongera umuyoboro wa Nyabugogo, yadutangarije ko igikorwa barimo kiri mu nshingano zabo, nko gutabara ariko akanemeza ko ibyo bakora bitazarangiza ikibazo cya Nyabugogo.

Lt.Col Ruvusha yagize ati: “Inzego z’ibanze zigomba gushyira umurego mu gukangurira abaturage kutajugunya imyanda muri Nyabugogo.”

Ariko se imyanda ijugunwa muri Nyabugogo yajya he?

Nk’uko bigaragara imyanda ni yo yabaye myinshi ifunga amazi, bituma amazi atabasha kubona uko atemba neza. Ikibabaje ni uko aya mazi ya Nyabugogo aho atemba agana mu byaro bitandukanye abaturage bayakoresha mu buzima bwabo bwa buri munsi, haba ndetse ngo hari n’abayanwa mu bice bituriye Akagera nkuko twabitangarijwe n’abaturage.

Mu gukemura iki kibazo ku buryo burambye, Mme Mukasonga Solange, umuyobozi w’akarere ka Nyarugenge yatangarije UM– USEKE.COM ko mubyakozwe harimo kwigisha abaturage ibijyanye no kuvangura imyanda, igikorwa cyakozwe n’umujyi wa Kigali ndetse umushinga wa UNDP.

Mme. Mukasonga Solange ati: “Ikibazo cy’imyanda ya Nyabugogo kirareba buri wese. Dukangurira abaturage gushyiraho amakoperative azajya abafasha gutwara imyanda iba iri mu ngo iwabo n’aho bakorera, icyo tudashaka ahanini ni ujugunya imyanda muri Nyabugogo cyangwa za Ruhurura zerekeza yo .”

Ku  bw’umuyobozi wa Nyarugenge,  kongera guhinga Nyabugogo byaba binyuranyije n’itegeko rishya rigenga ibishanga, rikaba ribuza guhinga mu nkengera z’igishanga kugera kuri m50.

Ikindi uyu muyobozi ahakana yivuye inyuma ni ikibazo cy’imyanda iva muri Gereza nkuru ya Kigali (1930), akaba avuga ko imyanda yagereza ibyazwamo ingufu za biogas,  nyamara ariko ngo hari imyanda iva mu mabagiro idafite aho ijya.

Ikibazo cy’imyanda izibya umuyoboro wa Nyabugogo kidakemuwe ku buryo burambye, ingaruka, nk’iyo kuzura kw’amazi agafunga imihanda cyane mu bihe nk’ibi by’imvura, ntikizigera gikemuka, kwangiza ibidukikije nacyo kikaba ari ikibazo cyihariye cyiyongera kuri ibi .

HATANGIMANA Ange Eric
UM– USEKE.COM