Impamvu 3 zaba zarateye Rwatubyaye kuva muri APR FC agasinyira Rayon
Ntibisanzwe mu mupira w’amaguru ko umukinnyi ava muri APR FC imukeneye agasinyira indi kipe yo mu Rwanda, by’umwihariko mukeba Rayon sports. Hari impamvu zidasanzwe Umuseke wegereanyije zishobora kuba zarateye Abdoul Rwatubyaye gufata uyu mwanzuro.
Tariki 28 Nyakanga 2016 nibwo byatangajwe ko myugariro wa APR FC n’ikipe y’igihugu Amavubi Abdoul Rwatubyaye afashe umwanzuro wo gusinyira Rayon sports.
Uyu musore w’imyaka 21 yakoze ibintu bidasanzwe kuko yabaye umukinnyi wa mbere wazamukiye mu ishuri ry’umupira w’amaguru rya APR FC (APR FC Academy) usinyiye Rayon sports kandi ikipe ye ikimukeneye.
Rwatubyaye yari yafashije APR FC gutwara igikombe cya shampiyona y’u Rwanda ‘AZAM Rwanda Premier League 2015-16’ byatumye anatorwa na AZAM TV mu 11 bitwaye neza kurusha abandi.
Abandi bakinnyi bose bavuye muri APR FC bajya muri Rayon sports ni abari birukanywe cyangwa batagikenewe muri iyi kipe y’ingabo z’u Rwanda. (Jimmy Gatete, Nizigiyimana Kalim Makenzi, Fuade Ndayisenga, Muganza Isaac, Yves Rwigema n’abandi).
Nyuma y’amezi atandatu (6) Rwatubyaye akora igeragezwa mu makipe atandukanye muri Turkey, ubu yagarutse mu Rwanda atangira imyitozo mu ikipe ye nshya. Nyuma yayo yabwiye abanyamakuru impamvu imwe yamuteye gufata umwanzuro wo kuva muri APR FC ajya muri Rayon sports. Yarasubije ati: “Impamvu yanteye gufata uyu mwanzuro ni ‘URUKUNDO’”
Uyu musore ntiyashatse kugira icyo yongera kuri iri jambo ‘Urukundo’. Byatumye Umuseke wegeranya impamvu eshatu zishobora kuba zarateye Rwatubyaye gufata uyu mwanzuro utunguranye.
1,URUKUNDO rw’amafaranga
Byavuzwe kenshi ko abakinnyi bazamukiye mu ishuri ry’umupira w’amaguru rya APR FC bakinira iyi kipe ariko nta masezerano yemewe n’amategeko basinye. Bituma badahabwa amafaranga (Recruitment) akwiye agaciro kabo buri myaka ibiri nkuko bikorerwa abandi bakinnyi APR FC igura ibavanye mu yandi makipe.
Bivugwa ko Abdoul Rwatubyaye atishimiraga kugenerwa amafaranga yo kwifashisha nta kumvikana hagati y’impande zombie. Ayo muri APR FC bita ‘equipement’. Kandi ashobora kuba atarishimiraga umushahara ahabwa agereranyije n’abandi APR FC yaguraga nka; Faustin Usengimana, Bizimana Djihad na bagenzi babo.
2,URUKUNDO rw’Inyogosho zidasanzwe n’ibirungo ku mubiri
Binyuze mu muvugizi Kazungu Claver, APR FC yatangaje ko itajya yemera gutunga abakinnyi bafite inyogosho zidasanzwe cyangwa ibindi birungo ku mubiri.
Mu nkuru Umuseke wakoze Tariki 29 Nzeri 2016, Kazungu avuga ku nyogosho n’uko abakinnyi bagaragara yagize ati: “Iyi kipe mugomba kumenya ko ari iy’ingabo z’igihugu. Nubwo abakinnyi atari abasirikare, ariko bagomba kugendera kuri ‘discipline’ yabo.”
Abdoul Rwatubyaye ni umusore usanzwe ukunda guhindura inyogosho kenshi. Bivigwa ko atishimiraga amategeko yashyirirwagaho na APR FC ku bijyanye n’ibirungo ashyira ku mubiri we. Byatumye ahitamo gusinyira Rayon sports yamureka agakora ibyo ashaka.
Kuva yava muri APR FC inyogosho n’isura ye byarahindutse cyane. kuko ubu afite ‘Tatouage’ nyinshi zigera no mu isura (mu maso)
3,URUKUNDO rw’ubwamamare
Indi mpamvu ikunze gutuma abakinnyi bahindura amakipe ni ugushaka ahari abakunzu n’abafana benshi bashobora kumuha icyubahiro, bakamuririmba bituma baba ibyamamare mu gihugu.
Iyi yaba impamvu ya gatatu ishobora kuba yaratumye Abdoul Rwatubyaye ahitamo kuva muri APR FC akajya muri Rayon sports. Kuko nubwo uyu musore yitwaye neza cyane mu mwaka ushize w’imikino, ntiyari uwo APR FC igenderaho cyangwa ngo abe umukinnyi ukunzwe cyane n’abafana.
Nyuma y’imyitozo ya mbere muri Rayon sports Rwatubyaye yishimiye uko yakiriwe gusa afata umwanya wo gushimira APR FC yamureze agira ati:
“Ni ikipe nkifite ku mutima kuko yampaye byinshi ngenderaho uyu munsi harimo umupira w’amaguru n’uburere. Nayivuyemo kuko umupira ari akazi katwerekeza ahatandukanye ariko nta kibazo na kimwe nagiranye nayo. Ndashimira abamfashije bose”
Umukino wa mbere biteganyijwe ko Abdoul Rwatubyaye wahawe numero esheshatu (6) azakinira Rayon sports uwo bazahura na Police FC tariki 25 Gashyantare 2017 kuri stade Regional ya Kigali
Roben NGABO
UM– USEKE
English
9 Comments
uyu azaba inyatsi kabisa , yisize ibintagazi byose ngo ni umu star, without displine, you are nothing
Abdul will fail kabisa, naho yari yaragiye i Burayi ntihasobanutse nta na results mutubwiye yakuyeyo wenda niba baramwanze kubera ubuswa
nI KUKI ABANTU BANGA DISCIPLINE KOKO?Buriya se biriya arabona aribyo byiza
iyo ajya mu ikipe ariko agasa n’abantu bafite umuco,ntacyo APR ihombye rwose
Kubaho wigenga nibyo byiza.Displine iyo uyifite mu kibuga ibindi ni ubuzima bwite bwiwe.Agomba kubaho uko ashaka.
Mureke kumuvugira ibyo atavuze. Niba yavuze urukundo akarekera aho. Ntaburenganzira na buke mufite yo kwinjira mubindi bitabareba. Abanyamakuru mugira amatsiko mabi kandi sibyiza ko mukomeza gutyo. Nk’ubu hari umuntu ushobora kwemera ibyo bintu byanyu bitagira umutwe n’ikibuno.
Mujye mutugezaho inkuru z’umwimerere kandi zisesenguye neza. Gusesengura inkuru bitandukanya no kwibaza mukigwi cy’undi muntu.
Ibi mwanditse ni ibyo mwibaza mwebwe ubwanyu à la place d’Abdoul. Pour quoi parler à la place de quelqu’un alors qu’il est?
Ubu busesenguzi burimo isebanya. Abdul ashatse yabarega. Harimo n’ubuswa bwinshi. Yivugiye urukundo mumwongereraho ibyo atababwiye.Urukundi ni iki ?
Kuki urukundo rw’ikipe utaruha agaciro. Ese abava muri Rayon bajya muri APR baba bagiye gushakayo discipline? Ese amafaranga ni nde uyanga? Muri Football ntabwo ari ishyurahamwe ry’ubutabazi aho umuntu yitangira abandi. Icyo cyo ushatse wagisiba.
Ibindi wavuze, ntawukunda icyo atarabona. Izo nyigosho,n’ubwo bwamamare niba ntabyo yari afite yari kubukinda ate? Ahbwo iyo uvuga irari byari kumvikana. Ariko urukundo ni ikintu kikuba ku mutima. Yakunze ikipe aharanira kuyikinira. Ni urukundo rw’ikipe kuko yari ayizi ayibona bityo imujya kumutima.
Ese ba Djamali, Djihad na Faustin bajya muri APR ko mutavuze ibyabajyanye, kuva muri APR ujya muri Rayon ni igitangaza ku buryo byasaba inkuru isesenguye. N’abatari we bazayivamo mube mutegura izindi nkuru. Bapfa kuba bafite ikipe ibaba kumutima.
Ni Urukundo nyine kuko Rayon sport ari urukungo erega n’abandi bakinnyi ba APR Bose ndetse n’abasirikare bikundirwa Rayon sport nuko ari uguhaha gusa naho ubundi bose bakwibera aba rayons!
Ni Urukundo nyine kuko Rayon sport ari urukundo erega n’abandi bakinnyi ba APR Bose ndetse n’abasirikare bikundira Rayon sport ( Gikundiro” nuko ari uguhaha gusa naho ubundi bose bakwibera aba rayons!
(” Bakunda rayon !!!!!…..)ni akaririmbo nkunda erega rayon ni Ikipe y’abanyarwanda igihe cyose! abakuru bajya batubwira uko Panteur noire yayiziraga ariko igakomeza igakundwa ntiyayisize se?
njye umuntu ujya unsetsa ni wa mwana witwa usengimana wagiye muri APR bamushutse kandi ejo bazamujugunya naho Abdul afite uburenganizira bwose bwo gukora icyo ashaka ku mubiri we kereka niba hari itegeko rishya tutazi rigenga imikoreshereze y’umubiri ikindi mu ngabo habamo abafite tattoo kandi ntibibabuza kurinda igihugu no kugikorera ahubwo bavuge ko bashaka gukoresha abantu babaha intica nt’ikize ngo nuko aribo ba babigishije no ibyo ntaho bihuriye
Comments are closed.