Imodoka zitwara abagenzi zatangiye gushyirwamo “Speed Governors”

Kuri uyu wa mbere Polisi, ifatanyije na Minisiteri y’ibikorwa remezo n’ikigo cy’igihugu gishinzwe imirimo imwe n’imwe ifitiye igihugu akamaro “RURA” batangije kumugaragaro igikorwa cyo gushyira mu mdoka zitwara abagenzi icyuma gipima kandi kikagabanya umuvuduko “Speed Governor”.

Iki cyuma kizwi nka “Speed Governor” gifasha mu gupima, ndetse kigendeye ku muvuduko cyagenewe iyo imodoka ishatse kuwurenga kirabigaragaza, ndetse ngo gishobora no kumanura umuvuduko w’imodoka yarengeje umuvuduko.

Mu Rwanda, umuvuduko ntarengwa w’imodoka zitwara abagenzi muri rusange ni Kilometero 60 ku isaha. Mu modoka iyi gahunda yatangiriyeho, hashyizwemo igikoresho kimeze nka Telefone kizajya cyerekana umuvuduko umushoferi yakoresheje, kandi kikaba gifite n’ubushobozi bwo kugabanyiriza imodoka umuvuduko mu gihe irengeje umuvuduko ntarengwa.

Iyo imodoka irengeje umuvuduko, iki cyuma cyashyizwe mu modoka kirabyerekana, utwaye imodoka aramutse anacomoye kiriya cyuma wenda kugira ngo akore amanyanga, ngo byose kiriya cyuma kibitangaho amakuru kuri Polisi na Kompanyi imodoka ibarizwamo.

Umushoferi w’imwe mu modoka zashyizwemo iri koranabuhanga, Kamana Malakiya yavuze ko bizagabanya impanuka zakorwaga n’imodoka kubera umuvuduko mwinshi.

Avuga ko nta mbogamizi kiriya gikoresho kibateye, uretse impungenge ngo zo kuba cyakwibwa cyangwa nk’umwana akagicomora, umushoferi akaba yabihanirwa bakeka ko yaba yabigizemo uruhare.

Kugira ngo imodoka ishyirwemo ikoranabuhanga rya ‘Speed Governor’, nyirayo asabwa kwishyura amafaranga y’u Rwanda 195,700.

Ku rundi ruhande, aya mafaranga hari Abashoferi bamwe bayabona nk’amananiza ku mwuga wabo kuko ngo aje yiyongera kuri internet basabwe kwishyura igitaraganya ariko ikaba idakora neza mu modoka nyinshi.

Alexis Nzahabwanimana, Umunyamabanga wa Leta ushinzwe ubwikorezi muri MININFRA yavuze ko gushyiraho ‘speed Governor’ bitavuze ko impanuka zigabanutse, kuko ngo uretse kurenza umuvuduko hari ubwo impanuka zinaterwa n’uburangare.

Yagize ati “Twasanze ari byiza gushyira Speed Governor mu modoka zitwara abagenzi ndetse n’izitwara imizigo mu rwego rwo guhangana n’impanuka, kuko iyo zikoze impanuka hapfa abantu benshi.”

Minisiteri y’ibikorwa remezo na Polisi bavuga ko uwo bazasanga adafite ‘Speed Governor’ azabihanirwa.

Daddy SADIKI RUBANGURA
UM– USEKE.RW