Imbwa n’inguge zicuditse bitangaje muri America

Ababonye uburyo imbwa yitwa Suryia n’inguge yitwa  Roscoe uburyo zicuditse ngo bibaza niba isi yaba itagiye kuba nk’ubwami bw’ijuru aho bavuga ko icyana cy’intare kizikinangurana n’icyana cy’intama.

Iyi nguge n’imbwa ngo zimaze gukora ubushuti budasanzwe mu gihe bitamenyerewe ko inguge n’imbwa zikorana neza.
Izi nyamaswa ngo zibanira mu rwororero rw’inyamaswa ruri mu mujyi wa Georgetown, muri leta ya Carolina muri USA.

Ubwo abashinzwe inyamaswa ziba aho birirwa barwana no kudatuma zimwe zihura n’izindi ngo ziticana cyangwa ngo zitere amahane, iyi mbwa n’inguge zo ngo ziribanira nta mpungenge.

Ndetse benshi banatungurwa no kubona inguge, bizwi ko zikunda imineke cyane, ifata umuneke yahawe ngo irye igashaka kuwihera iyi mbwa mucuti wayo kandi bizwi ko nyarubwana ku muneke itarebaho kereka ku gatukura.

Izi nshuti zimaze gukurura ibitangazamakuru byinshi bijya kuzisura, umunsi wazo aho zirirwa zikinira wagaragajwe kuri chaine ya TV ikomeye yitwa National Geographic TV, ndetse izi nshuti zananyuze mu kiganiro gikunzwe cyane muri America cya Oprah Winfrey show.

Dr Bhagavan Antle ukurikiranira hafi ubuzima bw’inyamswa ziba aho hantu yishingiye, avuga ko ubwo bwambere bazanaga iriya nguge, yahasanze iriya mbwa, maze ngo zihita zicakirana zitangira gukina nkaho zigeze kubana, kuva ubwo izi nyamaswa ngo ntizitandukana.

Jean Paul Gashumba

umuseke.com