Imbuto y’imyumbati izahangana n’indwara yarabonetse -MINAGRI

Kuri uyu wa gatatu, ubwo Umunyamabanga wa Leta muri Minisiteri y’ubuhinzi n’ubworozi ushinzwe ubuhinzi Fulgence Nsengiyumva yifatanyaga n’abahinzi bo Karere ka Ruhango, Umurenge wa Ruhango, Akagari ka Gikoma mu gikorwa cyo kubagara imyumbati mishya bateye, yizeje abahinzi b’imyumbati ko binyuze mu bushakashatsi ubu habonetse imbuto ibasha guhangana n’indwara.

Ubuhinzi bw’imyumbati, by’umwihariko mu Ntara y’Amajyepfo aho ihingwa cyane, bumaze imyaka hafi ine bwugarijwe n’indwara y’imyumbati yateje igihombo, ubukene ndetse n’inzara abahinzi nk’uko babivuga.

Abahinzi bo mu Karere ka Ruhango ubu bahawe imbuto nshya bari guhinga ngo ishobora guhangana n’indwara, n’ubwo batarayizera.

Rwandekwe Evariste umuhinzi w’imyumbati avuga ko yajyaga asarura Toni ebyiri z’imyumbati yumye ikamufasha kwikenura, ariko ngo ubu kubera indwara imaze imyaka hafi ine mu gihingwa cy’imyumbati ngo ubukene bwari bumwugarije kuko umusaruro warumbye cyane.

Uyu muhinzi avuga ko imyumbati bahinze ubu ariyo batezeho amakiriro, ngo iteze nk’uko iyo bahinganga mbere yeraga batindahara.

Yagize ati “Umungoti umwe nezaga imyumbati nkakuramo ibihumbi magana atandatu, naguzemo amasambu, nubakamo inzu, ariko se ubu urabona koko tuzongera kubona umusaruro nk’uwo twahoranye?”

Rwandekwe akavuga ko imbuto nshya bahawe ngo hari imirima ugeramo ugasanga imyumbati imwe n’imwe yatangiye kurwara nayo.

Ati “Dukwiye kubona imbuto zizajya zisimburana igihe imwe ishaje tukaba twamaze kubona indi, bitabaye ibyo twazongera tugahura n’ikibazo nk’icyo twahuye nacyo.”

Umuyobozi w’ikigo cy’igihugu gishinzwe gutubura imbuto cya ‘RAB’ mu Ntara y’Amajyepfo Gasana Parfait, yizeje abahinzi b’imyumbati ko bari gukora ibishoboka byose kugira ngo umuhinzi wese azabone imbuto kandi zishobora guhangana n’uburwayi.

Gasana avuga ko ngo babanje guha imbuto abatubuzi, ariko babasaba kujya baha imbuto abahinzi, ndetse ngo n’uturere twa Ruhango, Nyanza na Gisagara baduhaye imbuto kugira ngo tuyihe abahinzi batishoboye batabasha kugura imbuto.

Umunyamabanga wa Leta muri MINAGRI ushinzwe ubuhinzi Fulgence Nsengiyumva yizeza abaturage ndetse n’abahinzi muri rusange ko imbuto nshya yatanzwe ari imbuto yizewe, kandi ko hari no gukorwa ubushakashatsi ku mbuto zizajya zisimbura izishaje.

Ati “Nk’uko iyi mbuto nshya yavuye mu bushakashatsi, ubu hari ubundi bushakashatsi buri gukorwa bw’uko haboneka izindi mbuto nshya zihanganira indwara, iyi mbuto ishobora kumara imyaka ine itararwara, bigateganywa ko igihe imbuto yaba yananiwe twahita tuyisimbuza indi, ndabizeza ko ikibazo cy’imyumbati twagikemuye.”

Ibiro by’Ikigo cy’Igihugu gishinzwe guteza imbere ubuhinzi n’ubworozi (RAB) mu Ntara y’Amajyepfo bivuga ko kugeza ubu mu Karere ka Ruhango imyumbati imaze guhingwa ku kigero cya 60% by’ubuso bwose bwakabaye buhinzeho imyumbati.

Ngo bafite intego ko mu gihembwe cy’ihinga gitaha imyumbati yaba imaze guhingwa ku gipimo cya 80 ku ijana muri aka Karere.

Christine NDACYAYISENGA
UM– USEKE.RW/Ruhango