Ikizere cyo kujya kuri Mars mu 2050 kiri kuyoyoka

Umuhanga mu bugenge(Physique) witwa Dr Bertolami yabwiye MailOnLine ko ikizere abahanga bari basanganywe cy’uko muri 2030 cyangwa muri 2050 bazaba barakandagiye ku mubumbe utukura witwa Mars, bashatse bakurayo amaso kuko ngo bigoye cyane kubigeraho.

Yongeyeho ko nubwo NASA yo yemeza ko ahubwo izaba yaragezeyo muri 2030, yibeshya cyane kuko ngo nyuma yo kwiga no gusuzuma uburyo bwateganyijwe bwo kuba bagerayo bakoresheje ibyogajuru, yasanze nta na kimwe muri ibi byuma cyakwihangarira imirasire yangiza iba mu kirere gituranye na Mars(radiation).

Dr Bertolami yemeza ko urugendo ruva kw’Isi rujya kuri Mars ruzamara imyaka iri hagati y’ibiri n’itatu kandi ngo uru ni urugendo rurerure cyane kandi ruteje akaga kubera igihe biriya byuma bizamara byitegeza imirasire n’imyuka igize ikirere cya Mars.

Ati: “ Rwose nanjye mfite ubushake bw’uko twajyayo mu gihe twagennye ariko iyo ndebye nsanga bitazashoboka pee!”

Kuva ku Isi ujya kuri Mars hari urugendo rureshya na kilometero miliyoni magana

Icyo uyu muhanga yemera gishoboka ni uko ibyogajuru bitarimo abantu byo bishobora kujyayo mu gihe kireshya n’amezi icyenda ariko ibyo kuvuga ngo abantu bajyayo bari mu byogajuru, asanga ari inzozi kandi byaba ari ukwiyahura.

Incamake ku rugendo rugana kuri Mars:

Urebye ku nkengero z’imibumbe ya Mars n’Isi dutuye, usanga hari ahantu hashoboka hafasha abahanga kugera kuri Mars(orbital windows).

Hagati y’Isi na Mars harimo intera ingana na kilometero miliyoni 54.6 ariko kubera ingendo iyi mibumbe yombi ikora izenguruka izuba, iriya ntera ishobora kureshya na kilometero miliyoni 400.

Kubera iyi mibare turebye haruguru, birashobotse ko ibyogajuru nka Curiosity byabashije kugera kuri Mars ariko byose byatewe n’uko bacunze iyi mibumbe iri ku murongo umwe iteganye bagahita bohereza kiriya cyogajuru kiruka cyane.

Ubundi buryo abahanga bateganya kuzabyaza umusaruro barabaze basanga buzaboneka guhera muri Mutarama 2016 kugeza muri Mata 2016, icyo gihe bakaba bashobora kuzohereza bimwe mu byogajuru ariko bitarimo abantu.

Kugira ngo bishoboke ko bakohereza icyogajuru kirimo abantu bizabasaba kureba niba haboneka amahirwe yatuma icyo cyogajuru cyagenda kikagerayo byihuse hanyuma hakazaboneka andi mahirwe asa neza neza n’aya mbere yatuma cya cyogajuru kigaruka ku muvuduko cyagendeyeho mbere.

Ibi ariko dukurikije amategeko agenga uko imibumbe iyega(itembera mu kirere), biragoye ko aya mahirwe yaboneka neza neza nk’uko abahanga babyifuza.

Biramutse bibaye, byasaba imyaka hagati y’ibiri n’itatu ngo ziriya ngendo zombi zikorwe mu mahoro.

UM– USEKE.RW