Igihembwe cya 2: Ubukungu bw’u Rwanda bwazamutse ku kigero cya 7%

Ikigo cy’igihugu cy’ibarurishamibare cyasohoye imibare igaragaza ko ubukungu bw’u Rwanda bwazamutse ku kigero cya 7%, mu gihembwe cya kabiri cy’uyu mwaka biturutse ahanini ku rwego rwa Serivise rwazamutse cyane.

Urwego rw’inganda rwazamutse ku gipimo cy’10%, urw’ubuhinzi rwazamutse 5% n’urwa Serivise rwazamutse ku gipimo cya 6%, nibyo bikomeje gutuma umusaruro rusange w’igihugu ujya ejuru, ari nawo ushingirwaho bareba uko ubukungu bw’igihugu bwazamutse.

Muri rusange, umusaruro rusange w’igihugu wavuye kuri Miliyari 1,314 u Rwanda rwagize mu gihembwe cya kabiri cya 2014, ugera kuri Miliyari 1,414 mu gihembwe cya kabiri cya 2015.

Muri uwo musaruro rusange, 47% waturutse ku rwego rwa Serivise, 33% uva mu rwego rw’ubuhinzi, naho 14% uva ku rwego rw’inganda, naho indi 6% iva mu misoro n’amahoro.

Ikigo cy’igihugu rw’ibarurishamibare cyagaragaje kandi ko ibyoherezwa mu mahanga nabyo byazamutse ku kigero cya 30%, bihabanye cyane n’igipimo cya 6% cy’ibyoherejwe mu mahanga mu gihembwe cya kabiri cya 2014. Iri zamuka ry’ibyoherezwa mu mahanga, ngo rishingiye ahanini ku izamuka ry’icyayi ku kigero cya 27%.

Mu muhango wo gushyira ahagaragara iyi mibare wabaye kuwa gatatu w’iki cyumweru, Minisitiri w’Imari n’igenamigambi yatangaje ko iyi mibare itanga icyizere ku bukungu bw’u Rwanda, ndetse ko bigaragaza ko buhagaze neza.

Izamuka ry’ubukungu ku kigero cya 7% mu gihembwe cya kabiri, na 7,6% mu gihembwe cya mbere, biratanga icyizere ko igipimo cya 6,5% Guverinoma yari yihaye muri uyu mwaka wa 2015 gishobora kuzamuka nacyo kikajya kuri 7% cyangwa no hejuru yaho. Umwaka ushize wa 2014, ubukungu bw’u Rwanda bwazamutse ku gipimo cya 7%.

Umuseke.rw