Igihe kirageze ngo muzika nyarwanda isakare ku isi –The Ben

Nyuma y’aho akubutse mu Bubiligi mu gitaramo cyo kumurika album ye, The Ben yongeye kugaragara ku ruotonde rw’abahanzi bakomeye muri Afurika bagomba kwitabira iserikiramuco Nyafurika rizabera mu Bufaransa.

Niwe muhanzi uciye ako gahigo ko kuba azitabira icyo gitaramo nk’umuhanzi w’umunyarwanda mu bahanzi bakomeye muri Afurika batumiwe muri iryo serukiramuco.

Bwa mbere mu mateka y’u Rwanda nibwo hazagaragara abanyarwanda barenze umwe kuri stage ya Zenith i Paris imwe mu nzu z’imyidagaduro zikomeye ku isi.

The Ben na Franco (Coller la Petite) bongerewe mu bahanzi bibihangange muri Afrika bazaririmba mu gitaramo L’Afrique au Zenith.

Mu byo The Ben yatangarije Umuseke, yavuze ko nta mpamvu yo guhora abahanzi nyarwanda bihebye bumva ko ntaho bazamenera ngo bamenyekanishe muzika nyarwanda ku isi.

Ahubwo abasaba gukomeza gushyigikirana no kurushaho gukora cyane ku buryo ikindi gihe mu maserukiramuco nkayo azajya ahuriramo abanyarwanda barenze batanu.

Abandi bahanzi bakomeye bazitabira iryo serukiramuco bo muri Afurika ni Awilo Longomba, Dj Arafat, Eddy Kenzo, Singuila, Thierry Cham, Toofan na Wizboy.

Biteganyijwe ko tariki ya 27 Werurwe 2016 i Paris muri Zenith, aribwo hazabera iryo serukiramuco nyafurika.

Mu bazakiyobora iryo serukiramuco nka (MCs) hakaba harimo n’ umunyarwandakazi Solange Burabyo. Mu bazacuranga umuziki aribo aba Djs, umunyarwandakazi wamamaye i Burayi no muri Africa witwa Nyirimbabazi Flora cyangwa se Dj Princess Flor akazaba ahari.

Joel Rutaganda

UM– USEKE.RW