Ibyo banshimira bimwe nimwe mubimfashamo- Kagame

Mu kiganiro yagiranye n’abitabiriye umuganda mu murenge wa Niboye mu karere ka Kicukiro kuri uyu wa 27 Kamena,  Perezida wa Repubulika  Paul Kagame yabwiye abaturage  bari muri uwo muganda ko bimwe mu byo ashimirwa ari bo baba babikoze.

Nk’uko bisanzwe nyuma y’umuganda abawitabiriye bagirana ikiganiro bakungurana ibitekerezo ku bintu bitandukanye. Nyuma y’uyu muganda, Umukuru w’Igihugu  yabwiye abawitabiriye muri Niboye ko ibikorwa nk’ibi bizamura igihugu bigerwaho ku bufatanye bw’abayobozi n’abayoborwa.

Mbere y’uko abaturage bakurikirana ijambo ry’umukuru w’igihugu, umuyobozi w’Akarere  ka Kicukiro Paul Jules Ndamage washimiye Umukuru w’igihugu ibyiza byinshi amaze kugeza ku banyarwanda .

Perezida Kagame mu ijambo rye  yashimiye ubufatanye bw’abaturage n’abayobozi mu bikorwa biteza imbere igihugu.

Yagize ati: “ …Hatari ubufatanye ntacyo twageraho. Ubufatanye bw’abayobozi n’abayoborwa nibwo butuma hari ikigerwaho mu bikorwa byose.”

Umukuru w’igihugu yashimiye buri wese ukomeje guharanira ubwo bufatanye.

Umukuru w’igihugu yemeje ko aho igihugu kigeze mu iterambere byatewe n’uruhare  rwa buri wese waharaniye kwihesha agaciro akanagahesha igihugu cye.

Ati: “Abantu nta mahirwe baduhaga, bari baraduhebye, natwe ubwacu twasaga nk’abihebye, ariko kuko twanze kwiheba bihoraho; biragaragarira buri wese aho tuvuye n’aho dugeze kandi bitangaza abantu, bakumirwa; bakayoberwa uko dukora ibintu.”

Yavuze ko abantu basuraga u Rwanda muri 1994 ndetse no bihe byakurikiyeho basangaga abantu ari indembe ariko ngo iyo hagize ugaruka ubu ayoberwa niba ari abandi bantu bavuye hanze baza muri iki gihugu cyangwa ari ba bandi yabonye.

Umukuru w’igihugu yemeje ko ibi ari ibyo kwishimira kubera ubufatanye bwa bose.

Intambwe u Rwanda rumaze kugeraho, Perezida Kagame yavuze ko ikwiye kubera buri wese urufatiro rwo guharanira kugera ku rwego  rwisumbuye ndetse ikaba umusemburo wo kongera umwete mu bikorwa biganisha kuri urwo rwego.

Umukuru w’igihugu yibukije abaturage ko ibi bisaba kuba igihugu gifitite umutekano kandi buri wese akagira uruhare mu kuwubungabunga.

 Mu kiganiro cye kandi Umukuru w’igihugu  yibukije abanyarwanda ko ak’imuhana kaza imvura ihise bityo ko amaboko yabo ariyo azatuma babasha kwigira ngo kwiteza imbere.

Ati “…Undi uwo ariwe wese icyo yakora  ni ukugutiza imbaraga,… ukugutiza umusanzu, kandi iyo abiguhaye nabwo  aba ashobora kubisubirana igihe cyose ashatse, kuko biba  atari ibyawe.”

Agaragaza ingaruka zo kwiringira inkunga z’amahanga yagize ati “ ibi baguha ukakira,  ugashimira ngo yakugiriye neza, ngo yakugiriye impuhwe,.. burya ntazo aba agufitiye ahubwo aba akubeshya.”

Mu ijambo Mayor wa Kicukiro, Paul Jules Ndamage yavuze, yabwiye umukuru w’igihugu ko abaturage ba Kicukiro bamugeneye ubutumwa.

Ubwo butumwa bwavugaga ko ngo u Rwanda rwagize abaruyoboye ariko ngo ni ubwa mbere iki gihugu kigize umukuru w’igihugu uhuza abagituye bityo ngo abaturage barifuza ko bazakomezanya nawe

N’ubwo Umukuru w’igihugu atigeze abigarukaho mu ijambo rye, mu minsi ishize yakunze kubwira abafite ibitekerezo bitandukanye ku cyifuzo cy’uko yakomeza kuyobora abanyarwanda muri manda itaha ko bakomeza kubigiraho impaka bikazafatwaho umwanzuro uzanyura Abanyarwanda bose.

Muri uyu muganda abaturage ba Kicukiro bakoranye n’Umukuru w’igihugu hatunganyijwe umuhanda ureshya na kilometero eshatu n’igice uzafasha abatuye mu murenge wa Niboye gukomeza guhahirana no kugenderanira n’abatuye indi mirenge baturanye ya Kicukiro.

Martin NIYONKURU

UM– USEKE.RW