Ibyishimo Young Grace yagize kuva avutse ni ukuba umuhanzikazi

Abayizera Young Grace Housna umuhanzikazi mu njyana ya HipHop, atangaza ko bimwe mu byishimo ashobora kuba yaragize kuva avutse ari ukubona ari umuhanzikazi.

Nyuma yo kumenya ubwenge mu bintu byose yahuye nabyo Young Grace asanga nta kintu na kimwe gishobora kuba cyamushimisha nko kuba yitwa umuhanzikazi kandi udafite abakunzi bacye.

Kugeza ubu abahanzikazi muri muzika Nyarwanda baracyari bacye ugereranyije n’abahanzi, bityo umuntu akaba yakwibaza impamvu abakobwa badatinyuka kuza mu ruhando rwa muzika kandi abenshi usanga baba bafite impano yo kuririmba.

Mu kiganiro na UM– USEKE, Young Grace yagize ati”Najyaga numva indirimbo kuri radiyo nkiri umwana nkashaka kurunguruka ngo ndebemo umuntu urimo kuririmba.

Nkumva mbese ari ibintu bidasanzwe kubona uko radiyo ingana ishobora kujyamo umuntu akavuga, aho nkuriye mbaye umuhanzikazi nicyo kintu cya mbere numva cyanshimishije kuba hari abantu nanjye banyumva kuri radiyo cyangwa se ugasanga hari benshi bibaza ibyo nanjye nibazaga”.

Abayizera Grace ni umwe mu bahanzikazi bakunzwe mu njyana ya HipHop dore ko yanitabiriye irushanwa rya Primus Guma Guma Super Star ryari ribaye ku nshuro ya kabiri mu Rwanda aho yaviriyemo ku mwanya wa nyuma.

Reba amashusho y’indirimbo ‘Bingo’ ya Young Grace aherutse gushyira hanze.

Joel Rutaganda
ububiko.umusekehost.com