USA n’inshuti zayo birashinjwa akajagari kari mu Isi

Umunyamakuru Stephen Glover wandika asesengura politiki y’Isi arashinja igihugu cye cy’Ubwongereza n’ibindi bihugu byifatanyije by’i Burayi na USA ko ari bo nyirabayazana w’ibibazo bw’umutekano muke n’akajagari  birangwa mu bihugu byinshi by’Isi.

Ashingiye ku bibera muri Libya na Irak, Stephen yandika ko ibyo abayobozi babo bibwiraga ko bagiye gukemura ibibazo muri biriya bihugu, harimo no gukuraho abanyagitugu, ntacyo bagezeho ahubwo bateje akajagari gakomeye kabaye intandaro yo kwirema kw’imitwe y’iterabwoba.

Ubu mu gihe Isi yose ihangayikishijwe n’ibibera muri Ukraine na Israel-Gaza,hari ubundi bwicanyi bukomeye kandi bumaze igihe mu bihugu bya Libya na Irak.

Haba muri Irak cyangwa muri Libya, ibihugu bya USA n’Uburayi nibyo nyirabayazana. Ariko ubu ngo biratuje ku biri kubera hariya kurusha mbere mu gihe cya Sadam na Khadaffi ubwo ibihugu byabo byari bituje kurusha ubu.

Imirwano ya hato na hato ndetse n’inkongi y’umuriro yibasiye igihugu cya Libya byatumwe abakozi ba Ambasade z’ibihugu by’i Burayi harimo n’Ubwongerza bazinga ibyabo barataha.

Hagati aho, mu Majyaruguru ya Irak, umutwe witwa ISIS ukomeje kutegeka abaturage b’Abakirisitu kuba Abisilamu kandi bagakurikiza amategeko akaze ya Sharia, utabikoze akicwa. Ubwicanyi buteye ubwoba bumaze iminsi buhagaragara.

Akajagari n’impfu biri muri  gace ku Mosul bishyirwa ku mutwe wa George W Bush wahoze ayobora USA na Tony Blair wari Minisitiri w’Intebe w’Ubwongerza kuko aribo bameje kandi bagatangiza intambara muri 2003 bavuga ko yari igamije gusenya ibisasu bya kirimbuzi byari bihunitswe na Saddam Hussein. Nyamara ibyasenywe ntibyagaragajwe.

Ikibabaje nk’uko Stephen Golver abivuga, ni uko akanam kashyizweho n’Umuryango w’Abibumbye ndetse n’Ikigo mpuzamahanga kita ku ikorwa ry’ibisasu bya kirimbuzi kohorejwe muri Irak nta kimenyetso na kimwe cyerekanye ko Saddam yari afite ziriya ntwaro.

N’ubwo bwose Saddam ngo yari umunyagitugu, ariko yari yarahaye abaturage be umutekano n’uburumbuke kuko nta Mukirisitu muri miliyoni n’igice batuye Irak wigeze atoteza cyangwa ngo yicwe.

Kuva intambara yo guhirika Sadam yarangira, umubare w’Abakirisitu waragabanutse cyane ugera ku bihumbi 300 gusa ubu muri Irak, abatarahunze barishwe, abandi bahindura ukwemera ku ngufu.

Padiri w’Umwangilikani  Canon Andrew White avuga ko ‘Abakirisitu bashobora kuzacika muri Irak niba bikomeje gutyo.’

Abakirisitu bo muri Irak bari mu bambere babanje mu Isi. Kiriziya ya mbere yavumbuwe muri kariya gace ka Irak gaturanye na Syria kitwa Dura-Europos.

Inkuta z’iyi Kiriziya zasizwe amarangi hagati ya  232 AD( Anno-Domino bivuze nyuma ya Yezu) na 256 AD, iyi ikiba ari imyaka ya mbere y’uko umwami w’abami w’Umuromani Constantin yemera kubatizwa akaba Umukirisitu.

Stephen Glover yagize ati: “ Nibanze cyane ku Bakirisitu bo muri Irak atari uko nirengagije aba Shia nabo bugarijwe na ISIS ahubwo ni ukubera ko abayobozi b’isi bateje iriya ntambara nabo bitwa Abakirisitu.”

Bivugwa ko abantu 500,000 bahitanywe n’intambara ya Irak ndetse n’imvururu zayikurikiye baruta kure cyane abo Saddam Hussein bamushinjaga ko yishe. Ibyabaye kuri Saddam ngo byagereranywa kandi nibyabaye kuri Col. Khaddafi.

Khaddafi yategetse Libya imyaka 40. Stephen yemeza ko ku butegetsi bwa Khaddafi  nta mitwe yitwaje intwaro yigeze ivuka muri Libya, kandi abantu bo mu mpande z’Isi bose bumvaga bakwibera muri Benghazi cyangwa Tripoli, Umurwa mukuru wa Libya.

Uyu munyamakuru avuga ko Abanyaburayi na USA batera Libya na Iraq bibwiraga ko bazashyiraho abayobozi bakoresha Demokarasi kurusha abo basimbuye.

Ngo ibi bitekerezo byabo byari bishingiye ku bucucu, ubwirasi no kudashyira mu gaciro. Glover avuga ko Tony Blair  yerekanye guhubuka cyane mu myanzuro yafashe muri kiriya gihe.

Politike mpuzamahanga ye ngo yari ishingiye ku kugabanya Isi mo kabiri: igice cy’inyangamugayo n’igice cy’inkozi z’ibibi.

Mbere y’uko ibitero biyobowe n’Ubwongereza kuri Kosovo bitangira muri 1999, Tony Blair yavuze ko Perezida Slobodan Milosevic hamwe na Hasim Thaci nibagwa mu bitero nta kibazo bizateza kuko ari inkozi z’ibibi.

Golver ari: “ Sinshidikanya ko Milosevic yari umunyagitugu ariko Thaci we yari umuntu mwiza.”

Muri  2011, David Cameron nawe yakoze ikosa risa n’irya Blair ubwo yemeraga ko Col Mouammar Khaddafi avanwaho.

Vuba aha Blair yasuye agace ko mu Misiri kitwa Tahrir Square agamije gushyigikira abari bamaze guhirika Perezida Hosni Mubarak aho yavuze ko Demokarasi igiye gushinga imizi mu Misiri.

Nyuma byagaragaye ko yebeshye. David Cameron ngo ashobora kuba yaribwiraga ko Abanyaburayi na Amerika bashobora gutuma Demokarasi ishinga imizi mu Barabu nk’uko yashinze imizi iwabo.

Umwaka ushize nanone Tony Blair yari agiye gutuma Ubwongereza bwongera kujya mu ntambara muri Syria ariko Abadepite bamubera ibamba.

Nyuma byaje kugaragara ko inyeshyamba USA n’Ubwongereza byafashije kandi byifuzaga gukomeza gufasha, ari mbi kurusha uko babikekaga mbere urugamba rugitangira.

Ubu bamwe muri izi nyeshyamba nibo bagize umutwe wa ISIS waciye ibintu i Mosul muri Irak.

Glover avuga ko muri biriya byose byabaye, ubwibone no kudaha agaciro ingaruka zashoboraga guterwa n’izi ntambara aribyo byakururiye Ubwongereza gutakaza abasirikare n’ibikoresho n’amafaranga menshi muri ziriya mvururu zitagize icyo zungura Abongereza.

Stephen Glover ati: “ Abayobozi bacu bibeshye ko imbunda ishobora gutuma abategetsi b’igihugu runaka bashyiraho Demokarasi batagizemo uruhare.”

Abigereranya nibyo Abanyamerika bakoze muri Afghanistan ariko bakaza kwitahira bamaze kubona ko ntacyo bagezeho.

Isi ngo igomba gukura amasomo ku byabaye muri Iraq, Syria na Libya kuko abo ibihugu bikomeye bivuga ko ari babi cyane, mu bihugu byabo baba bakunzwe ku rugero rwo hejuru mu baturage ku buryo iyo bakuweho igitaraganya hifashishijwe imbuda z’ibihugu bikomeye, biteza akaduruvayo gakomeye kagira ingaruka mbi kandi zirambye.

Mailonline

UM– USEKE.RW