I Nairobi, Abarwayi bo mu mutwe 100 batorotse ibitaro…Hari umukwabu wo kubashaka

I Nairobi muri Kenya, batangije igikorwa cyo gushakisha abarwayi bo mu mutwe 100 batorotse ibitaro byitwa Mathari Hospital mu mpera z’icyumweru twaraye dusoje.

Aba barwayi bo mu mutwe batorotse ubwo abaganga basanzwe bakurikirana aba barwayi batangiraga ibikorwa by’imyigaragambyo nyuma yo kutumvikana na Minisiteri y’Ubuzima.

Umunyamabanga muri Minisiteri y’Ubuzima muri Kenya, Cleopa Mailu avuga ko Minisiteri yari bateguye inama n’aba baganga ku cyumweru gusa abayobozi ntibayitabira.

Mailu avuga ko ihuriro rw’abaforomo n’ababyaza muri Kenya, KNUN (Kenya National Union of Nurses) n’ihuriro ry’abaganga, KMPDU (Kenya Medical Practitioners and Pharmacists Union) yagiye agira ibyo asaba Minisiteri y’ubuzima nko kungezwa umushahara n’agahimbazamusyi ariko ntibyubahirizwe.

Ubwo abaganga bose bari batangiye ibikorwa byo kwamagana ibi bita akarengane ku mugoroba wo kuri iki cyumweru, abarwayi bo mu mutwe bo mu bitaro bya Mathari Hospital biri I Nairobi bahise basimbuka igipangu baratoroka.

I Nairobi, ubu ngo hatangijwe igikorwa cyo gushakisha aba barwayi bo mu mutwe batorotse ibitaro bakirara muri uyu mujyi.

UM– USEKE.RW